කොළඹ LNW: අල්ලස් ගත් රේගු නිළධාරීන් සිව් දෙනෙකු බරපතල වැඩ ඇතිව වසර තිස් පහක සිරදඩුවමකට යටත් කිරීමට කොළඹ මහාධිකරණය තීන්දු කර තිබේ.
එමෙන්ම එක් එක් විත්තිකරුවෙකුට රුපියල් මිලියන 125 බැගින් දඩ මුදලක් ද නියම කරන බව තීන්දුව ප්‍රකාශයට පත් කරමින් කොළඹ මහාධිකරණ විනිසුරු නාමල් බලල්ලේ මහතා නියෝග කර ඇත.
2015 වසරේදී ලංකා ගමනා ගමන මණ්ඩලය සදහා අවශ්‍ය අමතර කොටස් ගෙන්වන සමාගමකින් රුපියල් මිලියන 125 ක අල්ලස් මුදලක් ලබා ගනිමින් සිටිය දී එම නිලධාරීන් සිව් දෙනා අල්ලස් හෝ දූෂණ චෝදනා විමර්ශන කොමිෂන් සභාව මගින් අත්අඩංගුවට ගෙන තිබුණි.
මෙම රේගු නිළධාරීන් ඔවුන් ආනයනය කළ අමතර කොටස් මුදා හැරීම සදහා රුපියල් මිලියන 1500 ක බදු මුදලක් ගෙවිය යුතු යැයි අදාළ සමාගමට දැනුම් දී තිබෙන අතර එවැනි ගෙවීමක් සිදු කිරීමට ඔවුන් බැදී නැති බව සමාගමේ නියෝජිතයන් ප්‍රකාශ කිරීමෙන් පසු, අමතර කොටස් තොගය මුදා හැරීම සදහා මිලියන 150 ක අල්ලසක් එම රේගු නිළධාරීන් විසින් ඉල්ලා ඇත.
ආශිකා බ්‍රාහ්මණ
