රෂිකා හෙන්නායක නොවැම්බර් 09, කොළඹ (LNW):
ඊශ්‍රායල ජාතිකයින් ඇතුලු විදේශකයින් ආරක්ෂා කිරීමට ශ්‍රී ලංකා රජය ගත් කඩිනම් ක්‍රියාමාර්ග පිළිබදව ඊශ්‍රායල රජය ශ්‍රී ලංකා රජයට සිය ප්‍රසාදය පළ කර තිබෙන අතර, ආරුගම්බේ ප්‍රදේශයේ දී ඊශ්‍රායල ජාතිකයින් ඉලක්ක කර ප්‍රහාරයක් එල්ල කිරිමේ සුදානමක් පවතින බවට සැලවීමත් සමග ඔවුන්ගේ ආරක්ෂාව සම්බන්ධයෙන් ශ්‍රී ලංකා රජය ගත් කඩිනම් සහ තීරණාත්මක ක්‍රියාමාර්ග අගය කරන බව ඊශ්‍රායල රජය පවසයි.
ඊශ්‍රායල විදේශ කටයුතු අමාත්‍යාංශය ශ්‍රී ලංකා රජයට මෙලෙස ප්‍රශංසාව පළ කළ බව, ඊශ්‍රායලයේ ශ්‍රී ලංකා තානාපති නිමල් බණ්ඩාර මහතා සඳහන් කළේය. ඊශ්‍රායල විදේශ කටයුතු අමාත්‍යාංශයේ ආසියා පැසිෆික් අංශයේ ප්‍රධානී අවිවී එස්ට්‍රා මහතා ඊශ්‍රායල තානාපති නිමල් බණ්ඩාර මහතා හමු අවස්ථාවේ දී ද ශ්‍රී ලංකා රජයට මේ පිළිබද ප්‍රශංසාව පළ කර තිබෙන බව සඳහන් වේ.
