සටහන: සශිකලා මධුෂාණි
ජනවාරි 03; ලෝකය(අවුට්බවුන්ඩ් ටුඩේ) : දෝෂාභියෝගයට ලක් වූ ජනාධිපති යූන් සුක්-යෙයෝල් අත්අඩංගුවට ගැනීමේ උත්සාහයක් දකුණු කොරියානු පොලිසිය හා ජනාධිපති ආරක්ෂක කණ්ඩායම සමඟ පැය ගණනක් පැවති ගැටුමකින් පසු අත්හිටුවා ඇති බව වාර්තා වේ.
ඒ අනුව, ගැටුමින් අනතුරුව දූෂණ විමර්ශන කාර්යාලය (CIO)නිවේදනය කර තිබුණේ,මේ සම්බන්ධ සමාලෝචනයකින් පසු ඉදිරි පියවර තීරණය කරන බවයි.
දෙසැම්බර් 3 වැනි දින කෙටි යුද නීතිය පැනවීම හා සම්බන්ධ යැයි කියන කැරැල්ල සහ බලය අයුතු ලෙස භාවිතා කිරීම පිළිබඳ විමර්ශනයක කොටසක් ලෙස එරට අධිකරණය විසින් යූන් සුක්-යෙයෝල් අත්අඩංගුවට ගැනීමට වරෙන්තු නිකුත් කරණ ලද අතර වරෙන්තුව අවසන් වීමට පෙර යූන් අත්අඩංගුවට ගැනීමට විමර්ශකයින්ට ජනවාරි 6 දක්වා කාලය තිබේ.
කෙසේ නමුත්, අධිකරණය විසින් වරෙන්තු නිකුත් කිරීමත් සමඟ දින ගණනාවක් තිස්සේ ජනාධිපති නිල නිවස ඉදිරිපිට යූන්ගේ ආධාරකරුවෝ ජනාධිපතිවරයා අත්අඩංගුවට ගැනීමට විරෝධය පළකරමින් කඳවුරු බැඳගෙන සිටියි.
