ශ්‍රී ලංකාවට අත්‍යාවශ්‍ය ආහාර ද්‍රව්‍ය සහ ඖෂධ සපයා ගැනීම සඳහා ඉන්දියාව විසින් ලබාදුන් ඇමරිකානු ඩොලර් බිලියනයක ණය පහසුකමෙන් කොටසක් වැය කර ඉදිකිරීම් සඳහා අවශ්‍ය යකඩ ගෙන්වීමට රජය සූදානම් වන බවට පුවතක් මේ සතියේ සන්ඩේ ටයිම්ස් පුවත්පත වාර්තා කර තිබේ.
එම පුවතට අනුව අදාළ ණය මුදලෙන් මෙතෙක් භාවිතා කර ඇත්තේ ඇමරිකානු ඩොලර් මිලියන 250ක් පමණ වන අතර ඉතිරි ඇමරිකානු ඩොලර් මිලියන 750 න් කොටසක් යකඩ ආනයනය සඳහා වැය කිරීමට රජය සූදානම් වන බව සඳහන්.
රජයට හිතවත් ඉහළම පෙළේ ව්‍යාපාරිකයින් කිහිපදෙනෙකු මෙම වෑයම පසුපස සිටින බවයි එම පුවතේ දැක්වෙන්නේ.
අපත් ඇතුළු ලෝකයම දන්නේ ශ්‍රී ලංකාව දැඩි විදේශ විනිමය හිඟයකින් පෙළෙන බවත් ණය ගෙවාගැනීමට නොහැකි වීම සහ ඉතාම වේගයෙන් ඉහළ යන උද්ධමනය අනුව බරපතළ ආර්ථික අර්බුදයකට මුහුණ පා සිටින බවත් ය. එමෙන්ම ඉදිරියේදී ආහාර හිඟයකට ඇතුළු බරපතළ සමාජ ආර්ථික ව්‍යසනයක මුවවිටෙහි අප සිටින බව පැහැදිලිව පෙනේ.
එහෙත් රජයේ බලධාරීන් සිතන්නේ ශ්‍රී ලංකාවේ ඇත්තම අර්බුදය “යකඩ ඌනතාවයක්” කියාදැයි අප දන්නේ නැත.
RN
