කොළඹ LNW:ගාසා තීරයේ පැවති එකම විශේෂ පිළිකා රෝහල ඊශ්‍රායල ප්‍රහාර වලින් විනාශ වී ඇති බව අල්ජසීරා පුවත් සේවය වාර්තා කරයි.
තුර්කි – පලස්තීන මිත්‍රත්ව රෝහලක් ලෙස එය ඉදිකර තිබෙන අතර එයට අනුග්‍රහය දක්වා ඇත්තේ තුර්කි සහයෝගිතා සහ සම්බන්ධීකරණ ඒජන්සිය විසිනි.
එම රෝහලේ ඉදිකිරීම් 2011 දී ආරම්භ වී තිබෙන අතර 2017 දී එහි ඉදිකිරීම් අවසන් කර තිබේ. ඩොලර් මිලියන 70 ක වියදමින් නිම කර ඇති එම රෝහල ගාසා තීරයේ විශාලතම වෛද්‍ය පහසුකම් සහිත රෝහල ලෙස සලකනු ලැබූ අතර එහි මුළු අභ්‍යන්තර ඉඩ ප්‍රමාණය වර්ග මීටර් 33,400 (වර්ග අඩි 359,514) ක් ලෙස දැක්වෙයි.
පිළිකා රෝගීන්ට ප්‍රතිකාර කිරීම සඳහා ගාසා තීරයේ පිළිගත් එකම රෝහල එය වූ අතර වසරකට පුද්ගලයින් 30,000 කට ප්‍රතිකාර කිරීමේ හැකියාව ඊට තිබී ඇත.
එවැනි රෝහලක් විනාශ කිරීම භයානක අපරාධයක් ලෙස ගාසා හි සෞඛ්‍ය අමාත්‍යාංශය නිවේදනය කර තිබේ.
කෙසේවෙතත් සටන් විරාමය උල්ලංඝනය කරමින් මේ වන විට ඊශ්‍රායලය කටයුතු කරමින් හිඳින අතර ගෙවුණු සතියේ එල්ල වුණු ප්‍රහාරවලින් දරුවන් 200ක් සහ කාන්තාවන් 110කට වැඩි පිරිසක් මිය ගොස් තිබුණි.
ඒ අනුව ඊශ්‍රායලය ඉතා මිලේච්ජ ලෙස ගාසාව සම්බන්ධයෙන් හැසිරෙන ආකාරයක් පෙන්නුම් කරමින් තිබේ.
ආශිකා බ්‍රාහ්මණ
