රාමේශ්වරම් සහ මන්නාරම යා කරමින් පාලමක් ඉදිකිරීමටත් මන්නාරමේ සිට ත්‍රිකුණාමලය දක්වා අධිවේගී මාර්ගයක් ඉදිකිරීමටත් පසුගිය රජයන් ඉන්දියාව සමග එකඟ වී තිබුණු නමුත් ජාතික ජන බලවේගයේ රජය ඊට විරුද්ධ වී එම ව්‍යාපෘතිය ක්‍රියාත්මක කිරීම වැළැක්වූ බව විදේශ කටයුතු, සංචාරක හා විදේශ රැකියා අමාත්‍ය විජිත හේරත් පවසයි.
ප්‍රශ්නය – මෝදි අගමැතිතුමාගේ ව්‍යාපෘතියක් තිබ්බා ලංකාව සහ ඉන්දියාව යා කරන පාලමක් සම්බන්ධව. දැන් යෝජනාව ඉදිරිපත් වුණොත් රජයේ ස්ථාවරය කුමක්ද ?
“ඔබ හොඳම ප්‍රශ්නයක් මතු කළා. ඔය ගොඩක් අය කියනවානෙ අපි ඉන්දියාවට යටවුණා, පාවාදුන්නා කියලා. ඔන්න අපි එහෙම නොකරපු තැන. කලින් ආණ්ඩු, රනිල් වික්‍රමසිංහලාගෙ ආණ්ඩු එහෙම එකඟවෙලා හිටියෙ ඉන්දියාව සහ ලංකාව පාලමකින් යා කරන්න, ඔය රාමේශ්වරන් සහ අපේ මන්නාරම යා කරන්න. නමුත් අපි ඒකට එකඟවුණේ නෑ. අපි කිව්වා ඒක බෑ කියලා. ඒ නිසා රජයක් විදියට එකඟ වෙච්ච ඒවා විතරයි අපි ඉස්සරහට ගෙනිච්චේ. ඔය කලින් තිබුණු යෝජනාව, ඒ පාලම විතරක් නෙවෙයි පාලමේ ඉඳලා ත්‍රිකුණාමලයට යනකල් අධිවේගී පාරකුත් හදලා – ඇත්තටම ගත්තොත් එතනින් අර උතුර වෙන්වෙනවා මේක දාපු ගමන් මේ ලයින් එක දිගටම යන්න – ඉතින් අපි කිව්වා ඒකට අපි එකඟ නෑ. අපි ඒක කළේ නෑ”
ප්‍රශ්නය – ත්‍රිකුණාමලයේ ඉඳන් මන්නාරමට අධිවේගී මාර්ගයක්. ඉතින් රට වෙන් වෙන්නෙ කොහොමද ?
“රට වෙන් වෙන්නෙ නැහැ. වෙන් වෙන්න අවශ්‍ය කරන පාරක් හැදෙනවා. එක පළාතක් භෞතිකව එතෙන්ට පාරක් හැදෙනවා. ඒකට අපි එකඟ නෑ. ඒකයි අපි විරුද්ධ වුණේ. ත්‍රිකුණාමලයේ හබ් එකට අපි එකඟයි. බලශක්ති හබ් එකකට. නමුත් මේක පාලමත් එක්ක නෙ එන්නෙ”
ප්‍රශ්නය – ඉතින් හබ් එකට තියෙන්න එපැයි භෞතිකව පාරක් ?
“පුළුවන්. නැව් තියෙනවා … වෙන ක්‍රම තියෙනවා”
ප්‍රශ්නය – නැවක් එද්දී ඇමතිතුමා ඒකෙ තියෙන පිරිවැය ?
“ඒක අපි නෙවෙයිනෙ … එයිට වඩා අපේ භෞමික අඛණ්ඩතාවය බලන්න එපැයි. අපි ඒකයි, ආර්ථිකය කියන වාසියටම විතරක් සියල්ල ලඝු වෙන්නෙ නෑ. දැන් මේක විතරක් අපි සලකන්නෙ නෑ. මොකද මේකත් එක්ක අර පාලමත් එනවානෙ. එතකොට ඉන්දියාවයි ලංකාවයි යා කරන පාලමක් එක්කනෙ මේක එන්නෙ ? එතන ප්‍රශ්නයක් තියෙනවා. ඒ පාලම සහ අධිවේගී මාර්ගය එක ව්‍යාපෘතියක්. ඒකට අපි එකඟ වුණේ නෑ”
ප්‍රශ්නය – අපි රටක් එක්ක තව පාලම් දාන්න අවශ්‍ය වෙලා තියෙද්දී පාලම් කඩන එකද අපි කරන්න ඕනෙ ?
“පාලම් නෑනෙ … හදලා නෑනෙ. අපි හදන්නෙ නෑ. මම එකක් පැහැදිලි කරන්නම්. ඉන්දියාව සහ ලංකාව ආර්ථික වශයෙන් එක මට්ටමක ඉන්නවා නම් එවැනි පාලමක් ප්‍රශ්නයක් නෑ. සිංගප්පූරුව සහ මැලේසියාව ආර්ථික වශයෙන් දේශපාලන වශයෙන් සම මට්ටමක ඉන්න රටවල්. ඒ රටවල් දෙක යා කරන පාලම් හැදුණාට ඒකෙන් ස්වෛරීත්වයට භෞමික අඛණ්ඩතාවයට ප්‍රශ්නයක් නැහැ. හැබැයි අපි එහෙම නැහැ. අපි පුංචි රටක්. අපේ ආර්ථික දේශපාලන තත්වය වෙනස්. එවැනි පසුබිමක ඒවා හැදෙන එක ගැටලුකාරීයි”
විජිත හේරත් අමාත්‍යවරයා මේ බව පැවසුවේ ස්වර්ණවාහිනී නාලිකාවේ විකාශය වූ “රතු ඉර” දේශපාලන සංවාදයට එක්වෙමිනි.
