අද (03) උදෑසන කඳාන පොදු වෙළඳපොල අසලදී සිදුවූ වෙඩිතැබීමෙන් හිටපු අමාත්‍ය මංගල සමරවීර මහතාගේ පුද්ගලික ලේකම්වරයා වශයෙන් කටයුතු කළ සමීර මනහර මහතා තුවාල ලබා ඇති බව වාර්තා වේ.
සමීර මනහර ඔහුගේ මිතුරෙකු සමග මෝටර් රථයෙන් ගමන් කරමින් සිටියදී යතුරුපැදියකින් පැමිණි නාඳුනන තුවක්කුකරුවන් දෙදෙනෙකු විසින් මෙම වෙඩිතැබීම සිදුකර ඇති බව සඳහන්.
එහිදී සමීර මනහර සහ ඔහුගේ මිතුරා තුවාල ලබා රෝහල්ගත කර ඇති අතර ආරංචිමාර්ග පැවසුවේ සමීර මනහරගේ මිතුරා මියගොස් ඇති බවයි.
මෙසේ මියගොස් ඇත්තේ සමීර මනහරගේ දීර්ඝ කාලීන මිතුරෙකු වන උපාලි නමැති 50 හැවිරිදි අයෙකි.
වෙඩිතැබීමට හේතුව හෝ වෙඩිතැබූ ගිනිඅවිය කුමක්ද යන්න මෙතෙක් අනාවරණය වී නොමැති අතර පොලීසිය වැඩිදුර විමර්ශන සිදුකරයි.
