ඊයේ (24) මධ්‍යම රාත්‍රියේ සිට ඩීසල් මිල යළි රු.111කින් ඉහළ දැමීම නිසා ජනතාවටට ද බරක් නොවී පෞද්ගලික බස් කර්මාන්තය පවත්වාගෙන යාම සඳහා අද දිනය තුළදීම ඩීසල් සහනාධාරයක් ලබා දෙන ලෙස සමස්ත ලංකා පුද්ගලික බස් සමාගම් සමිති සම්මේලනයේ ප්‍රධාන ලේකම් අංජන ප්‍රියන්ජිත් මහතා අවධාරණය කළේය.
ඒ, අද උදෑසන මාධ්‍ය වෙත අදහස් දක්වමිනි.
පසුගිය මාසයේදීද ඉන්ධන මිල ඉහළ යාම නිසා බස් ගාස්තු වැඩි කිරීමට සිදු වූ අතර මෙය තවදුරටත් ජනතාවට දැරිය හැකිද යන ප්‍රශ්නයද පවතින හෙයින් බස් ගාස්තු වැඩි කිරීමේ අදහසක් නැතත් කර්මාන්තය පවත්වාගෙන යාම වෙනුවෙන් සහනාධාරයක් අවශ්‍ය වන බවයි ප්‍රියන්ජිත් මහතා සඳහන් කළේ.
කෙසේවෙතත් බස් ගාස්තු සංශෝධනය වන්නේ නම් අවම බස් ගාස්තුව රු.35ක් දක්වා හෝ වැඩි කළ යුතු වන අතර සෙසු ගාස්තුද 35%කින් වැඩි විය යුතු වන බව ඔහු කියාසිටියේය.
පවතින තත්ත්වය අනුව අද දහවල් වන විට බස් ගමනාගමනය නතර වනු ඇති බවද ප්‍රියන්ජිත් මහතා පැවසුවේ.
සති දෙකෙන් දෙකට මාසෙන් මාසයට තෙල් මිල ඉහළ යන්නේ නම් ප්‍රවාහන ගාස්තු වැඩි වීම සම්බන්ධයෙනුත් බස් සංගම හිමියන් ලෙස ඔවුන් සමඟද සාකච්ජා කර නිසි මිල සූත්‍රයක් ඉදිරිපත් කරන ලෙස විෂය භාර අමාත්‍ය බන්දුල ගුණවර්ධන මහතාට තමන් අවධාරණය කරන බවද ඔහු සඳහන් කරන ලදී.
එහෙත් එම මිල සූත්‍රය බන්දුල ගුණවර්ධන අමාත්‍යවරයාගේ රු. 2500 ජීවත් වීමේ හැකියාව වැනි සූත්‍රයක් නොවිය යුතු බවද හෙතෙම ප්‍රකාශ කළේය.
ASK
