සටහන – රුවන් නෙළුගොල්ල
බස්නාහිර පළාත් සභාවේ හිටපු මන්ත්‍රී අමල් සිල්වා වලාන මධ්‍යම දූෂණ මර්දන ප්‍රහාරක ඒකකය විසින් අද (28) අත්අඩංගුවට ගෙන තිබේ.
ඒ, ව්‍යාජ ලියකියවිලි යොදා ලියාපදිංචි කර තිබූ රුපියල් කෝටි 6ක් වටිනා සුඛෝපභෝගී රථවාහන 3ක් ද සමග ය.
වලාන මධ්‍යම දූෂණ මර්දන ප්‍රහාරක ඒකකයට ලැබුණු තොරතුරක් අනුව අද දිනයේදී සිදුකළ වැටළීමකදී මෙසේ ලෑන්ඩ් රෝවර් සහ මිට්සුබිෂි යන වර්ගවල ජීප් රථ තුනක් සමග හිටපු මන්ත්‍රීවරයාව අත් අඩංගුවට ගෙන ඇති අතර මෙම ජීප් රථ නීති විරෝධී ලෙස මෙරටට ආනයනය කර කූඨ ලේඛන භාවිතා කරමින් මෝටර් රථ ප්‍රවාහන දෙපාර්තමේන්තුව මගින් ව්‍යාජ අංක යටතේ ලියාපදිංචි කර ඇති බවත්, ඒ සඳහා රාජ්‍ය ආයතනවලට අයත් ගර්භිත කරන ලද වාහනවල ලියාපදිංචි අංක යටතේ කූඨ ලේඛන සකස් කර ඇති බවත් පොලිස් විමර්ශනවලදී අනාවරණය වී ඇති බව සඳහන්.
සැකකාර හිටපු පළාත් සභා මන්ත්‍රීවරයා හෙට (29) පානදුර මහේස්ත්‍රාත් අධිකරණයට ඉදිරිපත් කිරීමට නියමිත බවත් වාර්තා විය.
