කොළඹ LNW:2007 වසරේ නොවැම්බර් මස විජයදාස රාජපක්ෂ එවකට එක්සත් ජනතා නිදහස් සන්ධානයේ පාර්ලිමේන්තු මන්ත්‍රීවරයෙක් ආණුඩු පක්ෂයේ සිට විපක්ෂයට යාමෙන් පසු සීමාසහිත එක්සත් ප්‍රවෘත්ති පත්‍ර සමාගම (ලේක් හවුස්) මගින් මුද්‍රණය කොට බෙදාහරින ලද සිළුමිණ පුවත්පතේ පිටු දෙකක් පුරාවට ඔහු සම්බන්ධව ඇතුලත් කළ ද්වේශ සහගත අපහාසාත්මක ප්‍රකාශ හේතුවෙන් ඔහුට සිදුව ඇති අලාභය ලෙස රුපියල් මිලියන 500ක මුදලක් ගෙවන ලෙසට ඉල්ලා ඔහු 2009 වසරේ කොළඹ දිසා අධිකරණයේ එකී සීමාසහිත එක්සත් ප්‍රවෘත්ති පත්‍ර සමාගමට එම එම පුවත් පතේ ප්‍රධාන කතෘවරයාව සිටි කරුණාදාස සූරියආරච්චිට එරෙහිව නඩු පවරන ලදී.
පැමිණිළිකරු අයද සිටි අලාභ මුදල ගෙවන ලෙසට කොළඹ දිසා අධිකරණය 2010 වසරේ දී තීන්දු කරන ලදී. එකී තීන්දුවට එරෙහිව සීමාසහිත එක්සත් ප්‍රවෘත්ති පත්‍ර සමාගම කොළඹ සිවිල් අභියාචනා මහාධිකරණය වෙත අභියාචනයක් ඉදිරිපත් කරන ලද අතර එම අධිකරණය විසින් එම අභියාචනය 2013 වසරේ දී නිශ්ප්‍රභා කරන ලදී. එකී තීන්දුවට එරෙහිව සීමාසහිත එක්සත් ප්‍රවෘත්ති පත්‍ර සමාගම ශ්‍රේෂ්ඨාධිකරණය වෙත අභියාචනයක් ඉදිරිපත් කරන ලද අතර එම අභියාචනය පිළිබඳව දීර්ඝ විමර්ශනයකින් පසුව අද දින එනම් 2024 ඔක්තෝබර් මස 14 වන දින ශ්‍රේෂ්ඨාධිකරණය විසින් නිෂ්ප්‍රභා කරන ලදී. ඒ අනුව කොළඹ දිසා අධිකරණය විසින් විජයදාස රාජපක්ෂ මහතාට රුපියල් මිලියන 500ක මුදලක් ගෙවන ලෙසට සීමාසහිත එක්සත් ප්‍රවෘත්ති පත්‍ර සමාගමට එරෙහිව ඇතුළත් කරන ලද තීන්දුව බලාත්මක වනු ඇත.
ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල වන ජනක් ද සිල්වා , අචල වෙන්ගප්පුලි සහ සෝභිත රාජකරුණා යන මහත්වරු ඉදිරියේදී එම අභියාචනය විභාගයට ගන්නා ලද අතර පැමිණිලිකාර විජයදාස රාජපක්ෂ මහතා වෙනුවෙන් ජ්‍යෙෂඨ නීතීඥ ජී. ජී. අරුල්ප්‍රගාසම් මහතාගේ උපදේස් පරිදි නීතීඥ සජාන ද සොයිසා, රන්ධිවරී අරන්ගල සමඟ ජනාධිපති නීතිඥ කුවේර ද සොයිසා මහතා පෙනී සිටි අතර එක්සත් ප්‍රවෘත්ති පත්‍ර සමාගම වෙනුවෙන් ජනාධිපති නීතිඥ පයිස් මුස්තාපා මහතා පෙනී සිටින ලදී.
