රෂිකා හෙන්නායක මාර්තු 02,ලෝකය (අවුට්බවුන්ඩ් ටුඩේ):
බ්‍රිතාන්‍යය සිය ගුවන් කඳවුරු ඉරානයට එරෙහි ප්‍රහාර සඳහා භාවිත කිරීමට අමෙරිකාවට අවසර දීමත් සමඟ, සයිප්‍රසයේ පිහිටි RAF Akrotiri බ්‍රිතාන්‍ය යුද හමුදා මූලස්ථානයට ඩ්‍රෝන ප්‍රහාරයක් එල්ල වී තිබේ.
ඉරානය විසින් එල්ල කරන ලදැයි සැක කෙරෙන මෙම ප්‍රහාරයෙන් කඳවුරේ දේපළවලට සුළු හානි සිදුව ඇති අතර, මෙය දශක හතරකට පමණ පසු එම ස්ථානය ඉලක්ක කරගත් ප්‍රථම ප්‍රහාරය ලෙස වාර්තා වේ.
සයිප්‍රස් ජනාධිපතිවරයා තම රට කිසිදු යුද මෙහෙයුමකට සම්බන්ධ නොවන බව අවධාරණය කරන අතරතුර, එරට ආරක්ෂක අංශ ඉහළ සෝදිසියකින් පසුවන බව දන්වා ඇත.
යුරෝපා සංගමය ද මෙම තත්ත්වය හමුවේ සයිප්‍රසය වෙත සිය සහයෝගය පළ කර ඇති අතර, කලාපය තුළ පවතින ගැටුම්කාරී ස්වභාවය මෙයින් තවදුරටත් උත්සන්න වී තිබේ.
බ්‍රිතාන්‍ය ආරක්ෂක අමාත්‍යාංශය සිය නිලධාරීන්ගේ ආරක්ෂාව තහවුරු කිරීමට පියවර ගෙන ඇති අතර තවත් ප්‍රහාරයන් එල්ල වීමේ අවදානම හේතුවෙන් ප්‍රදේශයේ ආරක්ෂාව තර කර ඇත.
මෙය මැදපෙරදිග කලාපයේ පවතින යුදමය වාතාවරණය තීරණාත්මක ලෙස ව්‍යාප්ත වීමක් පෙන්නුම් කරන අවස්ථාවකි.
