පවත්නා ඉහළ උද්ධමන තත්වය හේතුවෙන් භාණ්ඩ මිල දිනපතා ඉහළ යමින් තිබෙනවා. වෙනදා රුපියලකින්, දෙකකින් ඉහළ ගිය භාණ්ඩවල මිල පවා එකවර 100 කින්, 200 කින් ඉහළ යන මට්ටමට උද්ධමනය ඉහළ ගොස් තිබේ.
මාස කිහිපයකට පෙර රුපියල් 60 කට අලෙවි වූ පාන් රාත්තලක් මේ වනවිට රුපියල් 300 ක් දක්වා ඉහළ ගොස් තිබේ.
කඩදාසි, තීන්ත ඇතුළු අමුද්රව්යවල මිල දිනෙන් දිනම ඉහළ යාම හේතුවෙන් පුවත්පත්වල මිල ඉහළ දැමීමටද යෝජනා වී තිබෙනවා.
මේ සම්බන්ධයෙන් ඊයේ (02) ජනමාධ්ය අමාත්යංශයේදී විශේෂ සාකච්ඡාවක් පැවැත්විණි. ඒ ජනමාධ්ය අමාත්යංශයේ ලේකම් අනුෂ පැල්පිට මහතාගේ ප්රධානත්වයෙනි.
අමුද්රව්ය මිල දරාගත නොහැකි මට්ටමට ඉහළ ගොස් ඇති හෙයින් දිනපතා පුවත්පතක මිල රුපියල් 100 දක්වාත් ඉරිදා පුවත්පතක මිල රුපියල් 200 – 250 දක්වාත් ඉහල දැමිය යුතු බවටයි ජනමාධ්ය ලේකම්වරයා යෝජනා කර තිබෙන්නේ.
කෙසේ නමුත් එම යෝජනාවට පුවත්පත් හිමිකරුවන්ගෙන් විරෝධය එල්ල වී තිබේ. ඔවුන් පවසා තිබෙන්නේ එවැනි මට්ටමකට පුවත්පතක මිල ඉහළ දැමුවහොත් අලෙවිය බොහෝ සෙයින් අඩුවනු ඇති බවයි.
ජීවන වියදම් ඉහළ යාම හේතුවෙන් මේ වනවිටත් පුවත්පත් අලෙවිය සැළකිය යුතු අන්දමකින් පහත වැටී ඇති බව පෙන්වා දෙන පුවත්පත් හිමිකරුවන් පවසන්නේ 250 ක් වැනි ඉහළ මිලක් නියම කළහොත් පුවත්පත් අලෙවිය සම්පූර්ණයෙන් බිඳවැටෙනු ඇති බවයි.
UN
