ශ්‍රී ලංකා පොදුජන පෙරමුණේ නායකත්ව ඇකඩමිය ආරම්භ කිරීම ඊයේ (03) කොළඹදී එම පක්ෂ නායක, හිටපු අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් සිදුකෙරිණි.
දේශපාලන විශිෂ්ටත්වය සඳහා වන මෙම නායකත්වය ඇකඩමිය නිර්මාණය කර ඇත්තේ ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ මහතාගේ සංකල්පයක් අනුව ය.
බැසිල් රාජපක්ෂ මහතා මෙම ඇකඩමියේ ආරම්භක සභාපතිවරයා වන අතර මහාචාර්ය රංජිත් බණ්ඩාර මහතා ඇතුළු පාලක මණ්ඩලයක් විසින් එය පවත්වාගෙන යනු ලැබේ.
ප්‍රජාතන්ත්‍රවාදය, දේශපාලනය, ව්‍යවසායකත්වය යනාදී වශයෙන් පන්ති 07ක් මෙම නායකත්ව ඇකඩමිය විසින් පවත්වනු ලබන අතර ඉදිරි මැතිවරණ සඳහා නාමයෝජනා ලබාදීමේදී මෙහි දායකත්වය සලකා බැලීමට ද නියමිත බව සඳහන්.
මෙම නායකත්ව ඇකඩමිය රටේ දේශපාලනයේ වෙනසක් වෙනුවෙන් සිදුකරන දීර්ඝ කාලීන වැඩසටහනක් වන අතර එහි කෙටි කාලීන බලාපොරොත්තු නොමැති බවයි එම පක්ෂයේ ප්‍රකාශකයකු පැවසුවේ.
RN
