සටහන: සශිකලා මධුෂාණි
ජූලි මස 12: ලෝකය(අවුට්බවුන්ඩ් ටුඩේ): ඇමෙරිකාව විසින් ඉරානයේ ඉලක්ක 140කට අධික සංඛ්‍යාවකට එල්ල කළ ගුවන් ප්‍රහාරවලට ප්‍රතිචාර ලෙස ඉරානය අද (12) ජෝර්දානය, බහරේනය, කටාර්, ඕමානය සහ එක්සත් අරාබි එමීර් රාජ්‍යය තුළ පිහිටි ඇමෙරිකානු හමුදා හා යුදමය ඉලක්ක රැසකට මිසයිල සහ ඩ්‍රෝන ප්‍රහාර මාලාවක් දියත් කර තිබේ.
ඉරාන ඉස්ලාමීය විප්ලවවාදී ආරක්ෂක බලකාය (IRGC) විශේෂ නිවේදනයක් නිකුත් කරමින් කියා තිබුණේ, ජෝර්දානයේ අණ හා පාලන මධ්‍යස්ථානයක්, කටාර්හි ජෙට් යානා නඩත්තු මධ්‍යස්ථානයක් සහ අණදෙන මධ්‍යස්ථානයක්, ඕමානයේ එක්සත් ජනපද නාවික හමුදාවට සහාය දෙන පහසුකම් ඇතුළු ස්ථාන කිහිපයක් ඉලක්ක කළ බවයි.
එම ප්‍රකාශ ස්වාධීනව සම්පූර්ණයෙන් තහවුරු වී නොමැති අතර, ඇතැම් රටවල් සිය ගුවන් ආරක්ෂක පද්ධති මඟින් ප්‍රහාර බොහොමයක් මැඩපැවැත්වූ බව ප්‍රකාශ කර ඇත.
මෙම ප්‍රහාර මාලාවට පෙර, හෝර්මුස් සමුද්‍ර සන්ධිය ආශ්‍රිත වාණිජ නෞකාවකට එල්ල වූ ප්‍රහාරයකට ප්‍රතිචාර වශයෙන් ඇමෙරිකාව ඉරානය තුළ ඉලක්ක 140කට ආසන්න සංඛ්‍යාවකට ගුවන් ප්‍රහාර එල්ල කළ බව එක්සත් ජනපද මධ්‍යම විධානය (CENTCOM) සඳහන් කර තිබේ.
ප්‍රහාර හේතුවෙන් කටාර් අගනුවර දෝහා ඇතුළු ප්‍රදේශ කිහිපයක පිපිරීම් හඬ ඇසුණු බව වාර්තා වන අතර, බහරේනය, එක්සත් අරාබි එමීර් රාජ්‍යය සහ කටාර් ඇතුළු රටවල් ගුවන් ආරක්ෂක පද්ධති සක්‍රීය කර මහජනතාවට ආරක්ෂක අනතුරු ඇඟවීම් නිකුත් කර තිබේ.
මේ අතර ඉරානය හෝර්මුස් සමුද්‍ර සන්ධිය වසා දමන බව ද ප්‍රකාශ කර ඇති අතර, එම තීරණය ගෝලීය තෙල් සැපයුමට සහ ජාත්‍යන්තර වෙළෙඳාමට දැඩි බලපෑමක් ඇති කළ හැකි බව විශ්ලේෂකයෝ අනතුරු අඟවති. කලාපීය රටවල් සහ ජාත්‍යන්තර ප්‍රජාව පාර්ශ්ව දෙකම වහාම උණුසුම් තත්ත්වය පහත හෙළා රාජ්‍යතාන්ත්‍රික විසඳුමක් සොයා ගන්නා ලෙස ඉල්ලා සිටී.
