සටහන – රුවන් නෙළුගොල්ල
හිටපු පොලිස්පති සී.ඩි.වික්‍රමරත්න මහතාගේ දේහය පිළිබඳ අවසන් කටයුතු හෙට (20) පොලිස් උත්තමාචාර සහිතව සිදුකිරිමට නියමිතව තිබේ.
විශ්‍රාමික පොලිස්පතිවරයෙකුගේ මියයාමකදී හිමිවන පොලිස් උත්තමාචාර හිටපු පොලිස්පති සී.ඩි.වික්‍රමරත්න මහතා වෙත ද ලබාදීමට තීරණය කර ඇති බවයි පොලිස් මාධ්‍ය ප්‍රකාශක සහකාර පොලිස් අධිකාරී එෆ්.යූ. වුට්ලර් මහතා සඳහන් කළේ.
සී. ඩී. වික්‍රමරත්න මහතාගේ දේහය මේ වනවිට කොළඹ පෞද්ගලික මල්ශාලාවක තැන්පත් කර ඇත.
ඒ මහතා පෙරේදා (17) උදෑසන සිය නිවසේදී වෙඩි වැදීමකින් මියගොස් තිබූ අතර එය සියදිවි නසාගැනීමක් බවට සැකකෙරේ.
ඔහුගේ දේහය සම්බන්ධ පශ්චාත් මරණ පරීක්ෂණය නැගෙනහිර කොළඹ රෝහලේ අධිකරණ වෛද්‍ය නිලධාරීවරයා විසින් සිදුකළ අතර එහිදී විවෘත තීන්දුවක් ලබාදී ඇත. එමෙන්ම ඔහුගේ සිරුරු කොටස් රජයේ රස පරීක්ෂකවරයා වෙත යොමුකිරිමට ද පියවර ගෙන ඇති බව සඳහන්.
(සාමාන්‍යයෙන් පොලිස් නිලධාරියකුගේ සියදිවි නසාගැනීමකදී අවසන් කටයුතු සඳහා පොලිස් උත්තමාචාර හිමිවන්නේ නැති අතර අදාළ නිලධාරියාගේ කලත්‍රයාට ඔහුගේ විශ්‍රාම වැටුප හිමිවන්නේ ද නැත.)
