රෂිකා හෙන්නායක ජූලි 23, කොළඹ LNW :
වාහන ආනයනය මත සියයට 50ක අතිරේක ගාස්තුවක් (surcharge) පැනවීමෙන් අනතුරුව වාහන ආනයනය කැපී පෙනෙන ලෙස අඩු වී ඇති බව මුදල් නියෝජ්‍ය අමාත්‍ය අනිල් ජයන්ත ප්‍රනාන්දු මහතා අද(23) ප්‍රකාශ කළේය.
මෙම වසරේ මුල් මාස හය තුළ වාහන ආනයනය සඳහා විවෘත කරන ලද ණයවර ලිපිවල (LCs) සාමාන්‍ය වටිනාකම ඇමරිකානු ඩොලර් මිලියන 3.5ක් බව අමාත්‍යවරයා පාර්ලිමේන්තුවේදී පැවසීය.
ජූලි 20 වැනි දින ඇමරිකානු ඩොලර් මිලියන 1.8ක සහ ජූලි 21 වැනි දින ඇමරිකානු ඩොලර් මිලියන 1.9ක ණයවර ලිපි පමණක් විවෘත කර ඇති බව ඔහු සඳහන් කළේය.
අදාළ අතිරේක ගාස්තුව පැනවීමට නියමිතව තිබූ අවසන් දිනය වූ මැයි 15 වැනි දින, ඇමරිකානු ඩොලර් මිලියන 23.71ක වටිනාකමකින් යුත් ණයවර ලිපි විවෘත කර තිබූ බව මීට පෙර අනාවරණය වී තිබුණි.
