සටහන – පුලී
අගෝස්තු 19, LNW (කොළඹ): ලෝකයේ අවධානය දිනාගත හැකි අසාමාන්‍ය වෛද්‍ය විද්‍යාවේ සිදුවීමක් ශ්‍රී ලංකාවෙන් වාර්තා වී තිබේ. ත්‍රිකුණාමලයේ රෝහලක වෛද්‍යවරුන් විසින් 55 හැවිරිදි පුද්ගලයෙකුගේ මුත්‍රාශයෙන් කිලෝග්‍රෑම් 3.1ක් බරැති දැවැන්ත මුත්‍රාශ ගලක් සැත්කමකින් ඉවත් කර තිබේ.
වෛද්‍යවරුන් පවසන්නේ මෙම ගල ලබාගත හැකි වාර්තාවලට අනුව මෙතෙක් ලේඛනගත කර ඇති විශාලතම මුත්‍රාශ ගල විය හැකි බවයි.
ආඝාතයකට ප්‍රතිකාර ලබා ගැනීම සඳහා රෝහල්ගතව සිටි පුද්ගලයාට මුත්‍රා කිරීමේ අපහසුතාවක් ඇති බව වෛද්‍යවරුන් හඳුනා ගැනීමෙන් පසු සිදු කළ පරීක්ෂණවලදී මුත්‍රාශයේ ගල් පවතින බව අනාවරණය වී තිබේ.
පසුව සිදු කළ සැත්කමේදී ඉවත් කළ ප්‍රධාන ගල කිලෝග්‍රෑම් 3.1ක් පමණ බරින් යුක්ත වූ අතර, එය සම්පූර්ණ කාලීන ළදරුවෙකුගේ බරට ආසන්නය. ගලේ ප්‍රමාණය පැස්බරා බිත්තරයකට සමාන බවද වෛද්‍යවරු පවසති.
සැත්කමට නායකත්වය දුන් වෛද්‍ය ප්‍රගලදන් බාලක්‍රිෂ්ණන් මාධ්‍යට පවසා ඇත්තේ ගල වසර පහත් දහයත් අතර කාලයක් රෝගියාගේ මුත්‍රාශයේ තිබී ඇති බවට විශ්වාස කරන බවයි.
“ලබාගත හැකි වාර්තාවලට අනුව, සැත්කමකින් ඉවත් කළ විශාලතම මුත්‍රාශ ගල මෙය බව අපි විශ්වාස කරනවා,” යනුවෙන් වෛද්‍යවරයා වැඩිදුරටත් සඳහන් කර තිබේ.
සැත්කමෙන් පසු රෝගියාගේ තත්ත්වය යහපත් බව වෛද්‍යවරු පවසති. කෙසේ වෙතත්, ඔහු ආඝාතය ඇතුළු අනෙකුත් සෞඛ්‍ය ගැටලු සඳහා තවදුරටත් රෝහලේ ප්‍රතිකාර ලබමින් සිටී.
ශ්‍රී ලංකාවේ ප්‍රාදේශීය රෝහලක සිදු වූ මෙම අසාමාන්‍ය සැත්කම, ලොව පුරා වෛද්‍ය ක්ෂේත්‍රයේද අවධානයට ලක්විය හැකි සිදුවීමක් බවට පත්ව තිබේ. මේ පිළිබඳ විස්තරයක් BBC යෙහි ද සඳහන් වී තිබිණි.
