සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) සැප්තැම්බර් 15: බංග්ලාදේශය මේ වන විට දරුණු සරම්ප ව්‍යාප්තියකට මුහුණ දෙමින් සිටින අතර, මරණ සංඛ්‍යාව 1,000 ඉක්මවා තිබේ.
එන්නත් ලබාදීම සඳහා දැවැන්ත වැඩසටහන් ක්‍රියාත්මක කළද, රට පුරා සරම්ප ආසාදන වේගයෙන් ඉහළ යමින් පවතින බව වාර්තා වේ.
සෞඛ්‍ය විශේෂඥයන් පෙන්වා දෙන්නේ වත්මන් අර්බුදයට ප්‍රධාන හේතුවක් වී ඇත්තේ පසුගිය වසර කිහිපය තුළ සාමාන්‍ය එන්නත්කරණ වැඩසටහන්වල ඇති වූ බාධා බවයි. එමගින් එන්නත් ලබා නොගත් හෝ සම්පූර්ණ එන්නත් මාත්‍රා ලබා නොගත් දරුවන් විශාල පිරිසක් රට තුළ ඉතිරි වී තිබීම රෝගය වේගයෙන් පැතිරීමට හේතු වී ඇත.
සරම්ප ඉතා වේගයෙන් පැතිරෙන වෛරස් රෝගයක් වන අතර, ජනගහනයෙන් ප්‍රමාණවත් ප්‍රතිශක්තියක් නොමැති විට කුඩා දරුවන් අතර විශාල වශයෙන් පැතිර යා හැකිය.
විශේෂයෙන්ම වයස අවුරුදු පහට අඩු දරුවන් සහ පෝෂණ ඌනතාවලින් පෙළෙන දරුවන් සරම්ප හේතුවෙන් ඇතිවන බරපතළ සංකූලතාවලට වැඩි අවදානමකට ලක්ව සිටින බව සෞඛ්‍ය බලධාරීන් පවසයි.
අර්බුදය පාලනය කිරීම සඳහා බංග්ලාදේශය දැවැන්ත හදිසි එන්නත්කරණ වැඩසටහනක් දියත් කර ඇති අතර, මිලියන ගණනක් දරුවන්ට එන්නත් ලබාදී තිබේ. කෙසේ වෙතත්, එන්නත් ලබාදිය යුතු සියලුම දරුවන් වෙත ළඟාවීම තවමත් අභියෝගයක් වී ඇත.
ලෝක සෞඛ්‍ය සංවිධානය අවධාරණය කරන්නේ සරම්ප වැනි එන්නත් මගින් වළක්වාගත හැකි රෝග පාලනය කිරීම සඳහා ඉහළ එන්නත් ආවරණයක් අඛණ්ඩව පවත්වා ගැනීම අත්‍යවශ්‍ය බවයි. එමෙන්ම විශේෂඥයන් පෙන්වා දෙන්නේ හදිසි එන්නත්කරණ ව්‍යාපාර පමණක් ප්‍රමාණවත් නොවන අතර, දීර්ඝකාලීනව ශක්තිමත් routine vaccination පද්ධතියක් පවත්වාගෙන යාම මෙම වැනි ව්‍යාප්ති වළක්වා ගැනීමට අත්‍යවශ්‍ය බවයි.
