රෂිකා හෙන්නායක සැප්තැම්බර් 15, කොළඹ LNW :
රුපියල් කෝටි 500කට අධික වටිනාකමකින් යුත් මත්ද්‍රව්‍ය වැටලීමකට තොරතුරු ලබාදුන් ඔත්තුකරුවෙකු ඝාතනය කිරීමට තැත්කළ සැකකරුවන් තිදෙනෙකු පොලිස් අත්අඩංගුවට පත්ව තිබේ
. සංවිධානාත්මක අපරාධකරුවන්ගේ මෙහෙයවීම මත මෙම පිරිස ව්‍යාජ පොලිස් ජීප් රථයක් සහ මන්නා පිහි යොදාගනිමින් අදාළ පුද්ගලයා පැහැරගෙන ගොස් ඝාතනය කිරීමට සැලසුම් කර ඇත. ඔත්තුකරු ඝාතනය කර ඔහුගේ හිස සහකාර පොලිස් අධිකාරීවරයෙකුගේ නිවස ඉදිරිපිට තැබීමට පවා මොවුන් සැලසුම් කර තිබූ බව විමර්ශනවලදී හෙළි විය.
අත්අඩංගුවට ගත් ප්‍රධාන සැකකරු වැල්ලම්පිටිය ප්‍රදේශයේ පදිංචි 41 හැවිරිදි මධුක චාමර නොහොත් “මධුවා” නමැත්තෙකු ලෙස හඳුනාගෙන ඇති අතර ඔහු සංවිධානාත්මක අපරාධකරුවන් වන “අංගොඩ ප්‍රියංකර” සහ “රූබන්” යන අයගේ සමීපතමයෙකු බව පොලීසිය සඳහන් කරයි.
මධුවා සතුව තිබී උපාය දූතයා ඝාතනය කිරීමට යොදා ගැනීමට සැලසුම් කර තිබූ මන්නා පිහි දෙකක්, හෙරොයින් ග්‍රෑම් 08ක් සහ පොලිස් ජීප් රථයකට සමාන ඉසුසු ටෘපර් වර්ගයේ ජීප් රථයට සවිකර තිබූ ව්‍යාජ අංක තහඩුවට අදාළ ලියකියවිලි ද පොලීසිය සොයාගෙන තිබේ.
එම අවස්ථාවේදී අත්අඩංගුවට ගත් දෙවන සැකකරු වන්නේ ඉංගිරිය වත්ත ප්‍රදේශයේ පදිංචි 38 හැවිරිදි නලීන් නමැත්තෙකි. ඔහු සතුව තිබී අයිස් මත්ද්‍රව්‍ය ග්‍රෑම් 06ක් සොයාගෙන තිබේ.
“මෙම දෙවන සැකකරු අත්අඩංගුවට ගන්නා අවස්ථාවේදී මොහු සන්තකයේ තිබී මොහුගේ අත් අකුරින් සිය පුතාට සියදිවි නසා ගන්නා බවට ලියන ලද ලිපියක් හමුවී ඇති අතර මහමගදී ජීවිත අවධානමක් ගනිමින් ආයුධවලින් කපාකොටා සිය ජීවිතය පරදුවට තබා මාරාන්තික ප්‍රහාරයක් ලෙස මහමගදී මෙම ඝාතනය සිදු කිරීමට සැළසුම් කර තිබූ බවට අනාවරණය වී ඇත”
තුන්වන සැකකරු ලෙස අත්අඩංගුවට ගෙන ඇත්තේ වැල්ලම්පිටිය ප්‍රදේශයේ පදිංචි 42 හැවිරිදි සුසන්ත නමැත්තෙකි.
ඔහු සතුව තිබී අයිස් මත්ද්‍රව්‍ය ග්‍රෑම් 03යි මිලිග්‍රෑම් 200ක් සොයාගෙන තිබේ.
සුසන්ත, ප්‍රධාන සැකකරු වන මධුවාගේ මස්සිනා බවත්, මධුවා සහ සුසන්ත යන දෙදෙනාට එරෙහිව වැල්ලම්පිටිය ප්‍රදේශයේදී තියුණු ආයුධයකින් පහරදී පුද්ගලයෙකු ඝාතනය කිරීම සම්බන්ධයෙන් නඩුවක් අලුත්කඩේ අංක 02 මහෙස්ත්‍රාත් අධිකරණයේ විභාග වෙමින් පවතින බවත් පොලීසිය පවසයි.
මෙම සැකකරුවන් තිදෙනා පොලිස් ජීප් රථයකට සමාන නිල් පැහැති ජීප් රථයකින් කිරින්ද ප්‍රදේශයේ උපාය දූතයා රැඳී සිටින නිවස වෙත ගොස් ඔහු පැහැරගෙන ගොස් ඝාතනය කිරීමට සැලසුම් කර තිබූ බව විමර්ශනවලදී අනාවරණය වී තිබේ.
අනතුරුව එම ඝාතනය සඳහා යොදාගත් ජීප් රථය ගිනි තබා විනාශ කිරීමට ද සැලසුම් කර තිබූ බව පොලීසිය සඳහන් කරයි.
කෙසේ වෙතත්, මෙම ඝාතන සැලසුම ක්‍රියාත්මක කිරීමට පෙර අදාළ ජීප් රථය කඩුවෙල, හේවාගම, රාජසිංහ මාවතේ පිහිටි ගරාජයක සඟවා තිබියදී පසුගිය සැප්තැම්බර් 08 වනදා වලාන මධ්‍යම දූෂණ මර්දන ප්‍රහාරක බළකායේ නිලධාරීන් විසින් සොයාගෙන තිබුණි.
එම ජීප් රථය වැඩිදුර විමර්ශන සඳහා කිරින්ද පොලිස් ස්ථානය වෙත භාරදී ඇත.
මෙම සිද්ධියට පසුබිම් වී ඇත්තේ 2025 නොවැම්බර් 29 වනදා කිරින්ද මුහුදුබඩ ප්‍රදේශයේදී සිදුකළ මත්ද්‍රව්‍ය වැටලීමක් බව වාර්තා වෙයි.
එහිදී රුපියල් කෝටි 500කට අධික වටිනාකමකින් යුත් අයිස් මත්ද්‍රව්‍ය කිලෝග්‍රෑම් 325ක්, එම මත්ද්‍රව්‍ය මෙරටට රැගෙන පැමිණි බව කියන සැකකරුවන් 08 දෙනෙකු සහ මත්ද්‍රව්‍ය ප්‍රවාහනය සඳහා සූදානම් කර තිබූ වාහන 06ක් අත්අඩංගුවට ගැනීමට පොලීසිය සමත්ව තිබුණි.
එම වැටලීම සඳහා සහකාර පොලිස් අධිකාරී රොහාන් ඕලුගල මහතාගේ මෙහෙයවීම යටතේ අදාළ උපාය දූතයා තොරතුරු ලබාදී තිබූ බව පොලීසිය පවසයි.
කෙසේ වෙතත්, විදේශගතව සිටින බව කියන “රූබන්” සහ “අංගොඩ ප්‍රියංකර” යන සංවිධානාත්මක අපරාධකරුවන් විසින් මෙහෙයවන ලද මෙම මත්ද්‍රව්‍ය ජාවාරම පොලීසියට හසුවීමෙන් සිදුවූ අලාභයට පළිගැනීමක් ලෙස උපාය දූතයා ඝාතනය කිරීමට සැලසුම් කර තිබූ බවට විමර්ශනවලදී තොරතුරු අනාවරණය වී ඇත.
එහිදී උපාය දූතයා පැහැරගෙන ගොස් ඝාතනය කර, ඔහුගේ හිස සහකාර පොලිස් අධිකාරීවරයාගේ නිවස ඉදිරිපිට දමා යාමට සැලසුම් කර තිබූ බවට ද තොරතුරු අනාවරණය වී තිබේ.
කෙසේ වෙතත්, එම සැලසුම ව්‍යර්ථ වීමෙන් අනතුරුව මාස 09කට පමණ පසු, එනම් 2026 සැප්තැම්බර් 05 වනදා උදෑසන 06.00ට පමණ කිරින්ද වරාය දෙසට ගමන් කරමින් සිටි උපාය දූතයා අනතුරකට ලක්කර ඝාතනය කිරීමට උත්සාහ කර ඇති බව පොලීසිය පවසයි.
ඒ සඳහා මෙම ව්‍යාජ පොලිස් ජීප් රථය යොදාගෙන ඇති අතර, එහිදී උපාය දූතයා ඉන් මිදීමට උත්සාහ කිරීමේදී තුවාල ලබා තිබේ.
මේ වන විට අදාළ ඔත්තුකරු මාරක රිය අනතුරකින් දිවි බේරාගෙන පොලිස් ආරක්ෂාව යටතේ රෝහල්ගතව ප්‍රතිකාර ලබමින් සිටී. මෙම සාහසික මෙහෙයුම වලාන මධ්‍යම දූෂණ මර්දන ප්‍රහාරක බලකායේ මැදිහත්වීමෙන් සාර්ථකව ව්‍යර්ථ කර ඇත.
- මෙම ඝාතන සැළැස්මට අදාලව ඉදිරි විමර්ශන රඳවා ගැනීමේ නියෝග මත වලාන මධ්‍යම දූෂණ මර්දන ප්‍රහාරක බළකාය විසින් සිදු කරනු ලබයි.
මේ සම්බන්ධ වැඩිදුර විමර්ශන පොලිස්පති නීතිඥ ප්‍රියන්ත වීරසූරිය මහතාගේ සෘජු අධීක්‍ෂණ යටතේ ක්‍රියාත්මක වන වලාන මධ්‍යම දූෂණ මර්දන ප්‍රහාරක බලකායේ අධ්‍යක්‍ෂ, සහකාර පොලිස් අධිකාරි රොහාන් ඕලුගල මහතාගේ නියෝග හා උපදෙස් පරිදි එම බලකායේ ස්ථානාධිපති ප්‍රධාන පොලිස් පරීක්‍ෂක ඉන්දික වීරසිංහගේ මෙහෙයවීමෙන් පොලිස් පරීක්‍ෂක චතුරංග, උප පොලිස් පරීක්‍ෂක ජයවීර, පොලිස් කොස්තාපල් වරුන් වන 84889 උදයකුමාර, 93425 ධනුෂ්ක, 100683 හේමන්ත, සහ පොලිස් කොස්තාපල් රියදුරු 105529 සිල්වා යන නිලධාරීන් විසින් සිදුකරනු ලබයි.
