රෂිකා හෙන්නායක ඔක්තෝබර් 01, කොළඹ LNW :
තොරතුර ලැබී දින 17ක් තිස්සේ සිදුවූයේ කුමක්ද?
මෙම සමස්ත සිදුවීමේ අතිශය තීරණාත්මක සංන්ධිස්ථානය සටහන් වන්නේ අගෝස්තු මස 14 වන දිනය. කොළඹ වරායේ නීතිවිරෝධී මත්ද්‍රව්‍ය අඩංගු බහාලුම් දෙකක් ඇති බවට ඉතා නිශ්චිත සහ ක්‍රියාත්මක විය හැකි තොරතුරක් ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා වෙත එදින ලැබී තිබුණි. ජ්‍යෙෂ්ඨ නියෝජ්‍ය පොලිස්පතිවරයා විසින් එදිනම මෙම රහසිගත තොරතුර පොලිස් මත්ද්‍රව්‍ය නාශක කාර්යාංශය (PNB) වෙත යොමු කරන ලදී.
කෙසේවෙතත්, එතරම් බරපතළ සහ ක්ෂණික මෙහෙයුම් අවශ්‍යතාවක් සහිත තොරතුරක් ලැබී තිබියදීත්, අගෝස්තු 31 වන දින තෙක් එනම් දින 17ක් පුරා අදාළ බහාලුම් පරීක්ෂා කිරීමට හෝ මත්ද්‍රව්‍ය අත්අඩංගුවට ගැනීමට කිසිදු සැලකිය යුතු මෙහෙයුමක් ක්‍රියාත්මක වූයේ නැත.
අගෝස්තු 14 වන දින උසස් නිලධාරී මට්ටමින් ලැබුණු නිශ්චිත බුද්ධි තොරතුර, විශේෂිත මත්ද්‍රව්‍ය නාශක ඒකකය වෙත යොමු කර තිබියදීත් සති දෙකකට වැඩි කාලයක් කිසිදු මෙහෙයුමකින් තොරව ගිලිහී යාම ප්‍රශ්නසහගත විය.
මත්ද්‍රව්‍ය ජාවාරම් මර්දනයේදී කාලය යනු තීරණාත්මකම සාධකයයි. බුද්ධි තොරතුරක් ලැබුණු වහාම එය මෙහෙයුම් මට්ටමින් ක්‍රියාත්මක නොකර, පරිපාලනමය වශයෙන් ලිපිගොනුවකට විතරක් සීමා වීමට ඉඩ හැරීම යනු සමස්ත වැටලීමේ අරමුණම අක්‍රිය කිරීමකි. මෙවැනි දින 17ක ප්‍රමාදයක් සන්නිවේදන ගැටලුවක් ලෙස පසෙකට තල්ලු කළ නොහැක්කේ, එය ආයතනික පද්ධතිය තුළ පවතින බරපතළ මෙහෙයුම් අසාර්ථකත්වය නිරූපණය කරන බැවිනි.
මත්ද්‍රව්‍ය නාශක කාර්යාංශය වෙනුවට වෙනත් ඒකකයක් පෙරමුණට
විශේෂිත පොලිස් මත්ද්‍රව්‍ය නාශක කාර්යාංශය අතින් මෙම තොරතුර ක්‍රියාත්මක නොවී අක්‍රියව පවතිද්දී, අගෝස්තු මස 22 වන දින වෙනත් නිලධාරියෙකු වෙත මෙම තොරතුරම ලැබෙයි. ඒ මධ්‍යම අපරාධ විමර්ශන කාර්යාංශයේ උප පොලිස් පරීක්ෂක ඒකනායක මහතා වෙතය. තොරතුරේ ඇති බරපතළකම වටහාගත් ඒකනායක මහතා ප්‍රමුඛ කණ්ඩායම වහා ක්‍රියාත්මක වී, රේගු නිලධාරීන් ද සම්බන්ධ කරගනිමින් අගෝස්තු 31 වන දින වරායට ගොස් අදාළ බහාලුම විවෘත කර මත්ද්‍රව්‍ය තොගය සොයාගැනීමට සමත් විය.
මෙහි ඇති උත්ප්‍රාසාත්මක කරුණ නම්, මධ්‍යම අපරාධ විමර්ශන කාර්යාංශය විසින් අදාළ බහාලුම විවෘත කර මත්ද්‍රව්‍ය අත්අඩංගුවට ගැනීමේ ප්‍රධාන මෙහෙයුම සිදුකරමින් සිටියදී, පොලිස් මත්ද්‍රව්‍ය නාශක කාර්යාංශයේ නිලධාරීන් පිරිසක් ද එම ස්ථානයට පැමිණ සිටීමයි.
මත්ද්‍රව්‍ය ජාවාරම් මැඩලීම සඳහාම විශේෂිත පුහුණුවක් සහ බලතල සහිත පූර්ණ කාලීන ඒකකයක් (PNB) නින්දෙන් නොනැගිට සිටියදී, සාමාන්‍ය අපරාධ විමර්ශන ඒකකයක නිලධාරියෙකුට ඉදිරිපත් වී මෙම මහා පරිමාණ වැටලීම මෙහෙයවීමට සිදුවීම ශ්‍රී ලංකා පොලිස් ඉතිහාසයේ අතිශය අසාමාන්‍ය මෙන්ම ප්‍රශ්නකාරී සිදු වීමකි.
සරල නොසලකා හැරීමක්ද? නැතහොත් යම් පාර්ශ්වයකට වාසි සැලසීමේ කුමන්ත්‍රණයක්ද?
මෙම බරපතළ ප්‍රමාදය සහ මෙහෙයුම් පාඩුව සම්බන්ධයෙන් පොලිස්පතිවරයාගේ නියෝගයෙන් පොලිස් විශේෂ විමර්ශන ඒකකය (SIU) මඟින් අභ්‍යන්තර පරීක්ෂණයක් ආරම්භ කරන ලදී. එම මූලික පරීක්ෂණයේදී අනාවරණය වූයේ ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා ඇතුළු අදාළ නිලධාරීන් ස්වකීය රාජකාරිය පැහැර හරිමින්, අතිශය නොසැලකිලිමත් ලෙස කටයුතු කර ඇති බවයි.
කෙසේ වෙතත්, මෙම සිදුවීම හුදෙක් අභ්‍යන්තර පරිපාලනමය විනය විරෝධී ක්‍රියාවක් ලෙස පමණක් සලකා අවසන් කිරීමට SIU වාර්තාව ඉඩ තබා නැත. මෙම නොසැලකිල්ල පිටුපස කිසියම් අපරාධමය චේතනාවක් පවතින්නේද යන්න පිළිබඳව සොයා බැලිය යුතු බව එම වාර්තාව මඟින් නිර්දේශ කර ඇත.
තීරණාත්මක නීතිමය පියවර: නොසැලකිල්ල හුදෙක් රාජකාරිමය පැහැරහැරීමක් පමණක් ද, නැතහොත් ජාවාරම්කරුවන්ට හෝ පිටස්තර පාර්ශ්වයකට වාසි සැලසීමේ අරමුණින් සිදුකළ සැලසුම්සහගත අපරාධයක් ද යන්න තහවුරු කර අපරාධ චෝදනා ගොනුකිරීමට පොලිස්පතිවරයා විසින් අපරාධ පරීක්ෂණ දෙපාර්තමේන්තුවට (CID) නියෝග කිරීම.
මෙමඟින් පැහැදිලි වන්නේ සිද්ධිය පරිපාලනමය පරීක්ෂණයක සීමාවෙන් ඔබ්බට ගොස්, සෘජු අපරාධ විමර්ශනයක් (Criminal Investigation) බවට පරිවර්තනය වී ඇති බවයි. යම් හෙයකින් මෙම දින 17ක ප්‍රමාදය ජාවාරම්කරුවන්ට මත්ද්‍රව්‍ය තොගය ඉවත් කරගැනීමට හෝ නීතියෙන් බේරීමට ඉඩ සැලසීමේ අරමුණින් කළ එකක් බවට සී.අයි.ඩී. විමර්ශනවලදී තහවුරු වුවහොත්, අදාළ උසස් නිලධාරීන්ට එරෙහිව අපරාධ නීතිය යටතේ චෝදනා ගොනුකිරීමට නියමිතය.
කොළඹ වරායේ මත්ද්‍රව්‍ය සොයාගැනීමේ සිද්ධිය යනු තවත් එක් සාර්ථක වැටලීමක් හෝ ජාවාරම්කරුවන් පිරිසක් අත්අඩංගුවට ගැනීමේ පුවතක් පමණක් නොවේ. එය රටේ නීතිය ක්‍රියාත්මක කරන උසස්ම ආයතනවල විනිවිදභාවය, රාජකාරිමය වගවීම සහ පද්ධතියේ විශ්වාසනීයත්වය පිළිබඳ බරපතළ ප්‍රශ්නාර්ථයක් මතුවූ අවස්ථාවකි. විශේෂිත ඒකක අක්‍රිය වෙද්දී සාමාන්‍ය විමර්ශන ඒකක ඉදිරියට පැමිණීමට සිදුවීමත්, ජ්‍යෙෂ්ඨතම නිලධාරීන්ගේ ප්‍රමාදයන් පිටුපස අපරාධමය සැකයන් මතුවී සී.අයි.ඩී. පරීක්ෂණ පැවැත්වීමට සිදුවීමත් මඟින් පෙන්නුම් කරන්නේ සමස්ත යාන්ත්‍රණයේ පවතින ගැඹුරු හිඩැසයි.
