රෂිකා හෙන්නායක ඔක්තෝබර් 04, කොළඹ LNW :
Flydubai සහාය ගුවන් නියමුවාගේ ඕස්ට්‍රේලියානු සබඳතා පිළිබඳව ඕස්ට්‍රේලියාව පරීක්ෂණ පවත්වයි. ටෙල් අවිව් (Tel Aviv) බලා පියාසර කරමින් තිබූ Flydubai ගුවන් යානයකදී එහි ප්‍රධාන ගුවන් නියමුවාට පහර දුන් සහාය ගුවන් නියමුවාට (co-pilot) ඇති “ඕස්ට්‍රේලියානු සබඳතා” පිළිබඳව එරට බලධාරීන් පරීක්ෂණ පවත්වමින් සිටින බව ඕස්ට්‍රේලියානු පොලිසිය ප්‍රකාශ කළේය.
ඩුබායි සිට ඊශ්‍රායලය බලා පියාසර කරමින් තිබූ Flydubai 1073 දරන ගුවන් යානයේ සහාය ගුවන් නියමුවා, හදිසි අවස්ථාවකදී භාවිතා කරන පොරවකින් ප්‍රධාන ගුවන් නියමුවාට පහර දුන් බව එක්සත් අරාබි එමීර් රාජ්‍යයේ (UAE) නීතිපතිවරයා ඊයේ(03) ප්‍රකාශ කළ අතර, මෙම සිදුවීම “ත්‍රස්තවාදී ප්‍රහාරයක්” ලෙසද හඳුන්වා දුන්නේය.
මෙම Flydubai ගුවන් යානයේ සහාය නියමුවා ඕමාන ජාතිකයෙකු වන හමාම් අල්-හමාමි (Hammam al-Hammami) බව හඳුනාගෙන ඇති බව පරීක්ෂණය පිළිබඳ දැනුම ඇති මූලාශ්‍ර දෙකක් රොයිටර් පුවත් සේවයට පැවසූහ.
ඔහුගේ අනන්‍යතාව තහවුරු කරන ලෙස කළ ඉල්ලීමට එක්සත් අරාබි එමීර් රාජ්‍යයේ බලධාරීන් වහාම ප්‍රතිචාර දැක්වූයේ නැත. අදහස් විමසීම සඳහා අල්-හමාමිව ස්වාධීනව සම්බන්ධ කර ගැනීමට රොයිටර් පුවත් සේවයට නොහැකි විය. ඕමාන බලධාරීන් ද මේ පිළිබඳව අදහස් දක්වා නොමැත. පූර්ණ පරීක්ෂණයක් ක්‍රියාත්මක වෙමින් පවතින බව Flydubai සමාගම පවසා ඇත.
පරීක්ෂණය පිළිබඳ තොරතුරු දන්නා මූලාශ්‍ර දෙකක් පැවසුවේ, අදාළ සහාය ගුවන් නියමුවා ඕස්ට්‍රේලියාවේ වික්ටෝරියා ප්‍රාන්තයේ අගනුවර වන මෙල්බර්න් හි විශ්වවිද්‍යාලයක අධ්‍යාපනය ලබා ඇති බවයි. ඔහු RMIT විශ්වවිද්‍යාලයේ අධ්‍යාපනය ලැබූ බව දේශීය මාධ්‍ය වාර්තා කළේය. මේ පිළිබඳව අදහස් දැක්වීමක් නොමැති බව RMIT ආයතනය රොයිටර් පුවත් සේවයට පැවසීය.
“ඕස්ට්‍රේලියානු ෆෙඩරල් පොලිසිය (AFP), වික්ටෝරියා පොලිසිය සහ ඕස්ට්‍රේලියානු ආරක්ෂක බුද්ධි අංශය (ASIO) යන ආයතනවලින් සමන්විත ‘වික්ටෝරියා ඒකාබද්ධ ත්‍රස්ත විරෝධී කණ්ඩායම’ (VIC JCTT), අදාළ පුද්ගලයාට ඕස්ට්‍රේලියාව සමඟ ඇති සබඳතා පිළිබඳව පරීක්ෂණ පවත්වන බව තහවුරු කරයි. සුදුසු වේලාවකදී ඒ පිළිබඳ යාවත්කාලීන තොරතුරු ලබා දෙනු ඇත,” යනුවෙන් ඕස්ට්‍රේලියානු ෆෙඩරල් පොලිසියේ (AFP) ප්‍රකාශකයෙකු පැවසීය.
පරීක්ෂණය පිළිබඳව දන්නා පුද්ගලයින් දෙදෙනෙකු උපුටා දක්වමින් ‘ෆිනෑන්ෂල් ටයිම්ස්’ (Financial Times) පුවත්පත ඉරිදා වාර්තා කළේ, අල්-හමාමි ඕස්ට්‍රේලියාවේ රැඳී සිටියදී අන්තවාදී මුස්ලිම් පල්ලි සහ අන්තවාදී වෙබ් අඩවි වෙත පිවිස ඇති බවට චෝදනා එල්ල වී ඇති බවයි.
එම පුවත්පතට අනුව, ඕස්ට්‍රේලියානු බුද්ධි අංශ සතුව මෙම පුද්ගලයා පිළිබඳ වාර්තාවක් (file) තිබී ඇත.
