පොලිස්පති ප්‍රියන්ත වීරසූරිය මහතාට එරෙහිව ශ්‍රී ලංකා මානව හිමිකම් කොමිෂන් සභාවට පැමිණිල්ලක් ඉදිරිපත්වී තිබේ.
පුරවැසි සංවිධානයේ කැඳවුම්කරු වන ශ්‍රී රවීන්ද්‍රන් නිශ්ශංකර් යන අය විසින් මෙම පැමිණිල්ල ඉදිරිපත් කර ඇත.
සැකකරුවන් පොලීසියේදී මියයාම වැළැක්වීම සඳහා ශ්‍රී ලංකා මානව හිමිකම් කොමිසම ලබාදුන් නිර්දේශ පොලිස්පතිවරයා විසින් ක්‍රියාත්මක නොකිරීම සම්බන්ධයෙන් සහ හෝමාගම පොලීසියේදී සැකකරුවකු මියයාමේ සිද්ධියට අදාළව මෙසේ පැමිණිල්ල ඉදිරිපත් කර ඇති බව සඳහන්.
විශේෂයෙන් පොලිස්පතිවරයා විසින් හෝමාගම මූලස්ථාන ප්‍රධාන පොලිස් පරීක්ෂක ලෙස පත්කරන ලද පුද්ගලයා ඊට පෙර ‘බී ශ්‍රේණියේ’ පොලිස් ස්ථානයක රාජකාරි කළ අයෙකු බවත් ඔහුට හෝමාගම පොලිස් ස්ථානයේ රාජකාරි නිසි පරිදි සිදුකරගෙන යාමට නොහැකි හෙයින් ඔහුව වෙනත් පොලිස් ස්ථානයට මාරුකර යවන ලෙස හෝමාගම කොට්ඨාස භාර ජ්‍යේෂ්ඨ පොලිස් අධිකාරීවරයා මෙම සිද්ධියට පෙරම පොලිස්පතිවරයාගෙන් ඉල්ලා ඇතත් පොලිස්පතිවරයා එය සිදුකර නොමැති බවත් මෙම පැමිණිල්ලෙහි සඳහන් කර තිබේ.
ඒ අනුව මානව හිමිකම් කොමිසම නිකුත් කර ඇති නිර්දේශ ක්‍රියාත්මක කරන්නැයි පොලිස්පතිවරයාට නියෝගයක් නිකුත් කරන ලෙසත් එසේ නොකිරීම පිළිබඳ විමර්ශනයක් කරන ලෙසත් එමෙන්ම හෝමාගම පොලීසියේදී මියගිය සැකකරුට සාධාරණයක් ඉටුකිරීමට මැදිහත්වන ලෙසත් පැමිණිලිකරු විසින් ඉල්ලා ඇත.
