1. ශ්‍රී ලංකාවේ තත්ත්වය මඟහරවා ගැනීමට චීනය දිගටම ධනාත්මක කාර්යභාරයක් ඉටු කරන බව චීන විදේශ අමාත්‍යාංශයේ මාධ්‍ය ප්‍රකාශකගෙන් ප්‍රකාශයක්! – විදේශ ආයෝජන සහ මූල්‍යකරණ හවුල්කරුවන්ගේ නීත්‍යානුකූල අයිතිවාසිකම් සහ අවශ්‍යතා තහවුරු කිරීමටත්, එහි ආයෝජන සහ මූල්‍ය පරිසරයේ ස්ථාවරත්වය සහ විශ්වසනීයත්වය පවත්වා ගැනීමටත් ශ්‍රී ලංකාව ස්වාධීන උත්සාහයන් ගනු ඇතැයි අපේක්ෂා කරන බව ද පවසයි.
2. ශ්‍රී ලංකාව චීනයේ ඉතා සුවිශේෂී මිතුරෙකු බවත්, වත්මන් අර්බුදකාරී තත්ත්වයෙන් ගොඩ ඒමට ශ්‍රී ලංකාවට සහය වන්නේ කෙසේදැයි චීනය සලකා බලමින් සිටින බවත්, චීන කොමියුනිස්ට් පක්ෂයේ ප්‍රධානී නියෝජ්‍ය අමාත්‍ය චෙන් ෂෝ විසින් චීනයේ සංචාරයක නිරත අගමැති දිනේෂ් ගුණවර්ධන මහතාට දැනුම් දුන් බව අගමැති මාධ්‍ය අංශය වාර්තා කරයි.
3. ඉන්දියාව ශ්‍රී ලංකාවේ ණය ප්‍රතිව්‍යුහගත කිරීමේ සැලැස්මට සහාය දෙන බව නිල වශයෙන් දැනුම් දී ඇති බව Bloomberg පුවත් සේවය වාර්තා කරයි.
4. නිදහස් දින සැමරුම් වියදම් අනාගතය සඳහා කරන ආයෝජනයක් බවත්, 100 වැනි නිදහස් දිනට පෙර එලැඹෙන වසර 25ක් තුළ රටේ ප්‍රතිසංස්කරණ වැඩසටහන සඳහා නව ආයතන සහ නීති රැසක් හඳුන්වා දෙන බවත් ජනාධිපති රනිල් වික්‍රමසිංහ මහතා ප්‍රකාශ කරයි.
5. එක්සත් ජනපද නාවික හමුදාව සහ Marine Corps බළකාය ජනවාරි 19-26 දක්වා ශ්‍රී ලංකා නාවික හමුදාව සහ ගුවන් හමුදාව සමඟ පුහුණු නාවික අභ්‍යාස මාලාවක් පැවැත්වීමේ සූදානමක්! – “කලාපීය ආරක්ෂක සහයෝගීතාව ප්‍රවර්ධනය කිරීම, සමුද්‍රීය හවුල්කාරිත්වයන් පවත්වාගෙන යාම සහ ශක්තිමත් කිරීම, සමුද්‍රීය අන්තර් ක්‍රියාකාරිත්වය වැඩි දියුණු කිරීම” සඳහා මෙම පුහුණු අභ්‍යාස මාලාව නිර්මාණය කර ඇත: පුහුණුව කොළඹ, ත්‍රිකුණාමලය සහ මුල්ලිකුල්ලම්වල පැවැත්වීමට නියමිතය.
6. වත්මන් ජනාධිපතිවරයාට ජාත්‍යන්තර සහය ලැබී ඔහු ආර්ථිකය ගොඩ නඟන බවට ප්‍රකාශ කළද ඔහු පත් කර මාස 7ක් ගතවී ඇතත් එය සිදු වී නොමැති බව සමගි ජන බලවේගයෙහි පාර්ලිමේන්තු මන්ත්‍රී එස්.එම්. මරික්කාර් ප්‍රකාශ කරයි – ඉන්ධන දැන් සලාකයට ලබා දී ඇති බවත්, මිනිසුන් අඩු ආහාර ප්‍රමාණයන් පරිභෝජනය කරන බවත්, විදුලි කප්පාදුව දිගටම පවතින බවත් පවසයි: රනිල් වික්‍රමසිංහ ජනාධිපති වූ පසු කිසිවක් වෙනස් වී නැති බවට මැසිවිලි නඟයි.
7. දුෂ්කර ආර්ථික පසුබිමක් තිබියදීත් මේ වසරේ ඖෂධ මිලදී ගැනීම සඳහා රුපියල් බිලියන 30-40ක් වෙන් කිරීමට පියවර ගන්නා බව ජනාධිපති රනිල් වික්‍රමසිංහ මහතා සහතික කරයි.
8. ශ්‍රී දළදා සමිඳුන් පිළිබඳව කළ අපහාසාත්මක ප්‍රකාශ සම්බන්ධයෙන් අත්අඩංගුවට පත් සමාජ මාධ්‍ය ක්‍රියාකාරී සේපාල් අමරසිංහ ජනවාරි 31 දක්වා තවදුරටත් රිමාන්ඩ්! – අන්තර් විශ්ව විද්‍යාල ශිෂ්‍ය බලමණ්ඩලයේ කැඳවුම්කරු වසන්ත මුදලිගේ යන අය ද ජනවාරි 31 වැනිදා දක්වා තවදුරටත් රිමාන්ඩ් කරනු ලැබීය.
9. සියලුම රාජ්‍ය සේවකයන්ගේ වැටුප් එක දිනකින් ගෙවීමට නොහැකි වුවද දින කිහිපයක කාලය තුළ සියලුම රාජ්‍ය සේවකයන්ගේ නියමිත වැටුප් ගෙවීමට කටයුතු කරන බවට ජනාධිපති රනිල් වික්‍රමසිංහ මහතා සහතික වෙයි – විශ්‍රාම වැටුප් සහ සමෘද්ධි දීමනා ගෙවීම රජයේ දෙවන සහ තෙවන ප්‍රමුඛතාවය වන බව ද පවසයි.
10. චීනයේ නව Covid-19 ව්‍යාප්තියක් ගැන බියක් පැවතියද 2023 දී චීනයෙන් සංචාරකයින් 240,000ක් අපේක්ෂා කරන බව සංචාරක සංවර්ධන අධිකාරියේ සභාපති ප්‍රියන්ත ප්‍රනාන්දු ප්‍රකාශ කරයි – ඔවුන්ගේ අලුත් අවුරුද්දෙන් පසු පෙබරවාරියේ දී චීන සංචාරකයින්ගේ සංඛ්‍යාව ඉහළ යනු ඇතැයි අපේක්ෂා කරයි.
