ඉසුරු පරාක්‍රම
කොළඹ (LNW): රජය විසින් ඉදිරිපත් කර තිබෙන ත්‍රස්ත විරෝධී පනත පාර්ලිමේන්තුව තුළ සම්මත නොකරන මෙන් හා ප්‍රජාතන්ත්‍රවාදය සහ නීතියේ ආධිපත්‍යයට මුල් තැන දී කටයුතු කරන මෙන් සියලු පාර්ලිමේන්තු මන්ත්‍රීවරුන්ගෙන් ඉල්ලා සිටින බව ශ්‍රී ලංකාවේ ප්‍රජාතන්ත්‍රවාදය වෙනුවෙන් නඟන හඬ සංවිධානය ඉල්ලීමක් කර තිබේ.
වත්මන් ත්‍රස්තවාදය වැළැක්වීමේ පනත යටතේ ශ්‍රී ලංකාව දශක 04 කට වැඩි කාලයක් මුළුල්ලේ අසීමිත ලෙස පීඩාවට පත්ව ඇති අතර, අතීතයේ සිදුවූ වැරදි නිවැරදි කොට මේ නව පනත් කෙටුම්පත සාධාරණ එකක් බවට පත් කිරීම සියළු පාර්ලිමේන්තු මන්ත්‍රීවරුන් සතු යුතුකමක් බව එම සංවිධානය විසින් නිකුත් කළ නිවේදනයක දැක්වේ.
බලය හොබවන දේශපාලඥයන් වශයෙන් සදාචාරාත්මක අවබෝධයෙන් සහ විශ්වාසනීයත්වයෙන් යුතුව නිවැරදි දේ කරන මෙන් සියලු මන්ත්‍රීවරුන්ගෙන් ඉල්ලා සිටින එම සංවිධානය, මෙය ආත්මාර්ථකාමීත්වය පරදවා මහජන අවශ්‍යතා, දේශපාලන අවංකත්වය සහ නීතියේ ආධිපත්‍යයට ගරු කිරීම ජයග්‍රහණය කරන එවැනි එක් මොහොතක් වනු ඇතැයි තමා බලාපොරොත්තු වන ද වැඩිදුරටත් පවසා සිටියි.
