ටෙක්සාස් ප්‍රාන්තයේ ඩලාස් නගරයට උතුරින් පිහිටි වෙළඳ සංකීර්ණයක නාදුනන තුවක්කුකරුවකු විසින් කරන ලද වෙඩි තැබීමක් හේතුවෙන් සාප්පු සවාරි යමින් සිටි පුද්ගලයන් අට දෙනෙකු මියගොස් හත් දෙනෙක් රෝහල්ගත කර ඇති බවත්, ඔවුන් තිදෙනෙකුගේ තත්වය බරපතල බවත් ටෙක්සාස්හි හදිසි සේවා ප්‍රකාශ කර තිබේ.
පොලීසිය විසින් මේ සම්බන්ධයෙන් ප්‍රකාශ කර තිබුණේ තුවක්කුකරු වෙඩිතබා ඝාතනය කළ බවත්, සැකකරු තනිවම ක්‍රියාත්මක වූ බවට සැක කරන බවත්ය.
ගිනි නිවීමේ ප්‍රධානී ජොනතන් බොයිඩ් පැවසුවේ තුවක්කුකරු ඇතුළු පුද්ගලයින් හත් දෙනෙකු එම ස්ථානයේදීම මියගොස් ඇති අතර දෙදෙනෙකු පසුව රෝහලේදී මිය ගිය බවයි. ටෙක්සාස් ආණ්ඩුකාර ග්‍රෙග් ඇබට් මෙම වෙඩි තැබීම “කිය නොහැකි ඛේදවාචකයක්” ලෙස විස්තර කළ අතර ප්‍රාන්ත බලධාරීන්ට ඕනෑම සහයක් ලබා දීමට සූදානම් බව පවසා තිබිණ.
එක්සත් ජනපදයේ තුවක්කු ප්‍රචණ්ඩත්වය පිළිබඳ ලේඛනාගාරයට අනුව, මේ වසරේ මේ දක්වා අවම වශයෙන් සමූහ වෙඩි තැබීම් 198 ක් වාර්තා වී තිබේ.
සටහන – සශිකලා මධුෂාණී
