*
දේශීය පුවත් විස්තරය: සාරාංශය 07/30
- ජනාධිපති රනිල් වික්‍රමසිංහ ජපාන විදේශ අමාත්‍ය හයාෂි යොෂිමාසා (HAYASHI Yoshimasa) හමුවූ අවස්ථාවේ දී ශ්‍රී ලංකාවේ ණය ප්‍රතිව්‍යුහගත කිරීමේ ක්‍රියාවලියේ දී ජපාන රජය දක්වන සහයෝගයට කෘතඥතාව පළ කරයි: සැහැල්ලු දුම්රිය ගමනාගමනය (LRT), වරාය නැගෙනහිර පර්යන්තය, මහනුවර සංවර්ධන සැලැස්ම, මධ්‍යම අධිවේගී මාර්ගය සහ බණ්ඩාරනායක ජාත්‍යන්තර ගුවන්තොටුපොළ පුළුල් කිරීම පිළිබඳව ද දෙපාර්ශවය අතර සාකච්ඡා පැවත්වී තිබේ.
- ආර්ථික අර්බුදය හමුවේ ඉහළ යන ජීවන වියදම සහ ආදායම් අහිමිවීමත් සමඟ ශ්‍රී ලංකාවේ අවම වශයෙන් මධ්‍යම පාන්තික පුද්ගලයන් මිලියන 3.18ක් වත් දරිද්‍රතා මට්ටමට වැටෙනු ඇති බව ලෝක බැංකුවේ මාලදිවයින, නේපාලය සහ ශ්‍රී ලංකාව සඳහා වන දේශීය අධ්‍යක්ෂ ෆාරිස් හදාද්-සර්වොස් (Faris Hadad-Zervos) පවසයි: මෙමඟින් ජාතික දරිද්‍රතා මට්ටම 25% දක්වා දෙගුණ වී ඇති බව අනාවරණය කරයි: ජනගහනයෙන් 13.1% ක් (මිලියන 2.9 ක ජනතාවක්) ‘දුප්පත්’ කාණ්ඩයට අයත් වේ; නාගරික ප්‍රදේශවල දරිද්‍රතාවය 15% දක්වා ඉහළ ගොස් ඇති අතර, ග්‍රාමීය ප්‍රදේශවල එය 52% දක්වා ඉහළ ගොස් ඇති බව ද අනාවරණය කරයි.
- කොළඹ පැවති විරෝධතාවයක් වාර්තා කරන අතරතුර බොරැල්ල පොලීසිය විසින් අමානුෂික අන්දමින් පහර දී අත්අඩංගුවට ගත් මාධ්‍යවේදී තරිඳු උඩුවරගෙදරට කොළඹ ප්‍රධාන මහේස්ත්‍රාත් අධිකරණය විසින් ඇප ලබා දීම සිදුවෙයි: මෙම අමානුෂික ප්‍රහාරය පිළිබඳ වහා විමර්ශනයක් දියත් කළ යුතු බව සාධාරණ සමාජයක් සඳහා වන ජාතික ව්‍යාපාරය පවසයි.
- ජපානය, ඉන්දියාව සහ ප්‍රංශය විසින් ශ්‍රී ලංකාවේ ණය පීඩාවට මුහුණ දීම සඳහා ලබා දෙන සහායට එක්වීමට ශ්‍රී ලංකාවේ විශාල ණයහිමියකු ලෙස චීනය සාදරයෙන් පිළිගන්නා බව ඉන්දීය මුදල් අමාත්‍ය නිර්මලා සීතාරාමන් පවසයි: ජාත්‍යන්තර මූල්‍ය අරමුදල සහ ලෝක බැංකුවේ පොදු රාමුව තුළ මෙන්ම “පිටත” ද මෙම අර්බුදය විසඳීම සඳහා පරිපූර්ණ, වඩා හොඳ සහ ඉක්මන් ප්‍රවේශයක් අවශ්‍ය බව අවධාරණය කරයි.
- විදේශීය ආයෝජකයන් විසින් මිලදී ගැනීම් ඉහළ නැංවීමත් සමඟ කොළඹ කොටස් වෙළඳපොල තියුනු ප්‍රගතියක් වාර්තා කරමින් වසරක් දක්වා ශුද්ධ ගලා ඒම රු. බිලියන 3 දක්වා ඉහළ නංවයි: සක්‍රීය S&P SL20 දර්ශකය 4% කින් සහ සක්‍රීය සියලු කොටස් මිල දර්ශකය (ASPI) 2.5% කින් ඉහළ වෙයි: කොටස් මිලියන 95.5 ක් ඇතුළත් පිරිවැටුම රු. බිලියන 3.3 දක්වා වර්ධනය වෙයි.
- සෞඛ්‍ය අමාත්‍යංශයේ අනුමැතියකින් තොරව සෞඛ්‍ය සේවකයන් විසින් මාධ්‍ය වෙත ප්‍රකාශ ලබා දීම වාරණය කරමින් නිකුත් කර ඇති චක්‍රලේඛය අවලංගු කිරීමට අපොහොසත් වීමට විරෝධය පළ කරමින් අගෝස්තු 03 වන දින සංකේත වැඩවර්ජනයක් දියත් කරන බව සෞඛ්‍ය වෘත්තිකයන්ගේ සංගමය පවසයි: ප්‍රශ්නගත චක්‍රලේඛය සම්බන්ධයෙන් මතුකළ කරුණුවලට සෞඛ්‍ය ලේකම්වරයා විසින් මෙතෙක් ප්‍රතිචාරයක් දක්වා නොමැති බව එම සංගමයේ සභාපති රවී කුමුදේශ් පවසයි: සෞඛ්‍ය වෘත්තිකයන් සහ සිවිල් සංවිධාන එක්ව රටේ සෞඛ්‍ය සේවයට අදාළ තවත් ගැටලු රැසක් හෙළි කරන විශේෂ සමුළුවක් එදින ම පවත්වනු ලබන බව ද පවසයි.
- ජාතික සංහිඳියාව ඇති කිරීමේ පියවරක් ලෙස පොලිස් බලතල නොමැතිව 13 වන ආණ්ඩුක්‍රම ව්‍යවස්ථා සංශෝධනය ක්‍රියාත්මක කිරීමට ජනාධිපති රනිල් වික්‍රමසිංහ විසින් ඉදිරිපත් කර ඇති යෝජනාව ජනප්‍රිය නොවිය හැකි මුත් එය රටේ අනාගතය පිළිබඳ ඉදිරි දැක්මක් සඳහා ගත් තීරණයක් බව උසස් අධ්‍යාපන රාජ්‍ය අමාත්‍ය සුරේන් රාඝවන් පවසයි: ‘අරගලයේ’ සක්‍රීයව නියැලී සිටි තරුණ තරුණියන් අපේක්ෂා කරන නව දේශපාලන ගමනකට මෙය මග පාදනු ඇති බව ද පවසයි.
- ජාතික මානසික සෞඛ්‍ය ආයතනයේ නේවාසිකව ප්‍රතිකාර ලබමින් සිටි රෝගියකු මරණයට පත්වීම සම්බන්ධයෙන් ස්වකීය යෝජනාවක් මත විමර්ශනයක් දියත් කළ බව ශ්‍රී ලංකා මානව හිමිකම් කොමිෂන් සභාව පවසයි: මෙම සිදුවීම සම්බන්ධයෙන් අදාළ පාර්ශ්වවලින් වාර්තා ඉල්ලා සිටින අතර, හැකි ඉක්මනින් තම කොමිසමේ සවිස්තරාත්මක පරීක්ෂණයක් සඳහා අදාළ සියලු පුද්ගලයන් කැඳවන බව පවසයි.
- ලබන මස ඉන්ධන මිල සංශෝධන අපේක්ෂාවෙන්, පෙට්‍රල් 92 සඳහා ඉන්ධන පිරවුම්හල් 101ක් සහ ලංකා ඔටෝ ඩීසල් සඳහා ඉන්ධන පිරවුම්හල් අලෙවි නියෝජිතයන් 61ක් 50%ක තොග ධාරිතාවක් පවත්වා ගෙන නොමැති බව ලංකා ඛනිජ තෙල් නීතිගත සංස්ථාව විසින් දැනුම් දී ඇති බව විදුලිබල හා බලශක්ති අමාත්‍ය කංචන විජේසේකර පවසයි: කෙසේවෙතත්, ඊයේ දින වන විට ඉන්ධන තොග අවශ්‍යතා පවත්වා ගැනීමට අලෙවි නියෝජිතයන් විසින් ප්‍රමාණවත් ඇණවුම් ලබා දී ඇති බව පවසයි: අවම තොග පවත්වා ගෙන නොගිය ඉන්ධන පිරවුම්හල් කිහිපයක කළමනාකාරීත්වය ලංකා ඛනිජ තෙල් නීතිගත සංස්ථාව විසින් ඉකුත් මස පවරා ගත් අතර, තවත් අලෙවි නියෝජිතයන් කිහිප දෙනෙකු සම්බන්ධයෙන් නීතිමය ක්‍රියාමාර්ග ගනිමින් සිටින බව ද පවසයි.
- ශ්‍රී ලංකා ක්‍රිකට් සභාපති ෂම්මි සිල්වා විසින් ඉදිරිපත් කළ බව කියන ඕස්ට්‍රේලියානු වීසා බලපත්‍ර සඳහා, ශ්‍රී ලංකා ක්‍රිකට් ආයතනයේ අනුමත කිරීමේ ලිපිවලට (letters of endorsement) ඇතුළත් කර ඇති නම් 21 අතරට ක්‍රීඩා අමාත්‍ය රොෂාන් රණසිංහගේ දියණියන් දෙදෙනාගේ නම් ද ඇතුළත් බවට වාර්තා පළවෙයි: පුද්ගලයනු 35 දෙනෙකු ඇතුළු නිලධාරීන් ඕස්ට්‍රේලියාවට යැවීම සඳහා ශ්‍රී ලංකා ක්‍රිකට් ආයතනය විසින් රු. මිලියන 68 ක මුදලක් වියදම් කර ඇති බව, 2022 ඕස්ට්‍රේලියාවේ පැවැත්වෙන T20 ලෝක කුසලාන තරඟාවලිය සඳහා ශ්‍රී ලංකා ක්‍රිකට් ආයතනය විසින් දරන ලද වියදම් පිළිබඳ විගණකාධිපතිවරයාගේ වාර්තාවේ කෙටුම්පතක් මගින් අනාවරණය වී ඇත.
