සටහන – රෂිකා හෙන්නායක
කොළඹ (LNW): වල්නාශක කුඩු වර්ගයක් පානීය ජලයට කලවම් කර බීමට දීමෙන් රෝගාතුර වූ සිසුවියන් හය දෙනෙකු රෝහල් ගත කර ඇති පුවතක් නාරම්මල ප්‍රදේශයේ පාසලකින් වාර්තා වනවා. මෙම සිදුවීම සිදුවී ඇත්තේ එම පාසලේ 10 වසරේ ඉගෙනුම ලබන සිසුවියන් පිරිසක් අතරයි.
එම විදුහලේ ශිෂ්‍ය නායක පදවිය සඳහා ඇතිවී තිබෙන තරගයක් මෙම සිදුවීමට පාදක හේතු වී ඇති බව විදුහල් ආරංචි මාර්ග පවසයි.
සැකකාර සිසුවිය පෙරේදා උදෑසන පැවති සඳුදා උදෑසන රැස්වීමට සහභාගි නොවී පන්ති කාමරයේ රැඳීසිට වල් නාශකය කුඩු සිසුවියන් කිහිපදෙනෙකුගේ පානීය ජල බෝතලවලට මිශ්‍ර කර ඇති බව අනාවරණය වී තිබේ. ඒ පාසලේ සවිකර ඇති CCTV කැමරා දර්ශන පරීක්ෂා කිරීමෙන් අනතුරුව සිද්ධියට සම්බන්ධ සිසුවිය හඳුනාගෙන ඇත.
සමීපතම මිතුරියන් පිරිසකගේ පානීය ජල බෝතල්වලට එම වල් නාශක මිශ්‍ර කර ඇති බව ද සිදුකළ පරීක්ෂණවලදී හෙළි වී ඇති අතර , වල් නාශක සහිත ජලය පානය කිරීමෙන් පසුව වමනය ඇති වී රෝගාතුරවූ සිසුවියන් පිරිස දැක බියපත්ව වල් නාශක එකතු කළ සිසුවියද එම ජලය පානය කර ඇත. නමුත් පොලීසිය පවසන්නේ සිසුවියන්ගේ තත්ත්වය බරපතළ නොවන බවයි.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
