දුම්රිය දෙපාර්තමේන්තුව සතු ඉන්ධන සංචිත ප්‍රමාණවත් වන්නේ තවත් දින 05 ක දුම්රිය ධාවන කටයුතු සඳහා පමණක් බව වාර්තා වේ. දුම්රිය සාමාන්‍යාධිකාරී ධම්මික ජයසුන්දර මහතා මේ බව මාධ්‍ය වෙත පවසා තිබෙනවා.
සාමාන්‍යයෙන් දුම්රිය දෙපාර්තමේන්තුව දින 10 කට ප්‍රමාණවත් ඉන්ධන සංචිත පවත්වාගෙන යන නමුත්, මේ වනවිට එම ඉන්ධන සංචිත 50% ක් දක්වා අඩු වී ඇති බව ජයසුන්දර මහතා පවසනවා. කෙසේ නමුත් මේ වනවිට දුම්රිය ධාවනයට කිසිදු බලපෑමක් සිදුව නොමැති බවයි ඔහු වැඩිදුරටත් පවසන්නේ.
කෙසේ නමුත් ඉන්ධන අර්බුදය තවදුරටත් උග්‍ර වුවහොත් දුම්රිය දෙපාර්තමේන්තුවට දෛනිකව ලබාදෙන ඉන්ධන සංචිත අඩු වනු ඇත. එසේ වුවහොත් දින 05 කට පසුව දුම්රිය ධාවනයද අඩාල වීමේ අවදානමක් මතුව තිබේ.
දෛනිකව ලංකා ඛනිජ තෙල් සංස්ථාව මගින් දුම්රිය දෙපාර්තමේන්තුවට ලබාදෙන ඉන්ධන ප්‍රමාණය ලීටර් ලක්ෂයකි.
මේ වනවිට මගී බස් රථ ධාවනයට ඉන්ධන හිගය සෘජුවම බලපා ඇති අතර මේ නිසා සඳුදා සිට බස් රථ 50% ක් මගී ධාවන කටයුතුවලින් ඉවත් කරන බව බස් සංගම් පවසනවා.
UN
