ආපදා කළමනාකරණ අමාත්යවරයා වශයෙන් කටයුතු කරමින් සිටි සමයේ නෙදර්ලන්තයෙන් පරිත්යාගයක් වශයෙන් ලැබුණු සුඛෝපභෝගී ජීප් රථයක් සිය පෞද්ගලික පරිහරණයට යොදාගනිමින් රජයට රුපියල් ලක්ෂ 10ක අලාභයක් සිදුකිරීම සම්බන්ධයෙන් පාර්ලිමේන්තු මන්ත්රී ඒ. එච්. එම්. ෆවුසි මහතාට එරෙහිව ගොනුකර ඇති නඩුව ලබන 29 වනදා යළි කැඳවීමට කොළඹ මහාධිකරණය අද (05) නියම කළේය.
ඒ, එම නඩුව අද කොළඹ මහාධිකරණ විනිසුරු ශවේන්ද්ර ප්රනාන්දු මහතා හමුවේ කැඳවූ අවස්ථාවේදී ය.
එහිදී විනිසුරුවරයා අල්ලස් හෝ දූෂණ චෝදනා විමර්ශන කොමිසමට වැඩිදුරටත් නියෝග කළේ මන්ත්රීවරයාගේ ඇඟිළි සලකුණු ලබාගෙන යළි වාර්තාවක් අධිකරණයට ඉදිරිපත් කරන ලෙසයි.
එහිදී විත්තිකාර මන්ත්රීවරයා වෙනුවෙන් පෙනී සිටි නීතීඥවරයා අධිකරණයට දන්වා සිටියේ මන්ත්රීවරයාට එරෙහිව ගොනුකර ඇති චෝදනා එල්ලා අස්කරගන්නා ලෙස දැනුම් දෙමින් තමන් පසුගිය මස 16 වනදා අල්ලස් කොමිසම වෙත ලිපියක් යොමු කළ බවත් ඒ සම්බන්ධයෙන් සලකා බලන බව දැනුම් දෙමින් එම කොමිසම පසුගිය 24 වනදා තමන්ට පිළිතුරු ලිපියක් ද එවා ඇති බවත් ය.
RN
