Tag: ගාසා හි ළමා අරමුදල

රෂිකා හෙන්නායක අගෝස්තු 08, කොළඹ (LNW):

ඊයේ (07) දින “ගාසා හි ළමා අරමුදල (Children of Gaza Fund) “ වෙත ලැබුණු තවත් ඇමරිකානු ඩොලර් පන්ලක්ෂ අනූදහසක (590,000/-) මුදල පලස්තීන රජය වෙත නිල වශයෙන් භාරදීම ජනාධිපති රනිල් වික්‍රමසිංහ මහතාගේ ප්‍රධානත්වයෙන් ජනාධිපති කාර්යාලයේ දි සිදු විය.

ඊට අදාළ නිල ලිපි ලේඛන ශ්‍රී ලංකාවේ පලස්තීන තානාපති ආචාර්ය සුහයිර් එම්.එච්. සෙයිඩ් (H. E. Dr. Zuhair M H Dar Zaid) සහ එක්සත් ජාතීන්ගේ සහන වැඩ නියෝජිතායතනයේ (UNRWA) එක්සත් ජාතීන්ගේ ශ්‍රී ලංකා නිත්‍ය නේවාසික නියෝජිත අසූසා කුබෝටා (Azusa Kubota)යන මහත්ම මහත්මින් වෙත ජනාධිපතිවරයා විසින් භාර දෙනු ලැබීය.

ජනාධිපති රනිල් වික්‍රමසිංහ මහතා අමාත්‍ය මණ්ඩලය වෙත කරන ලද යෝජනාවක් අනුව 2024 මාර්තු මස 04 වන දින පැවති අමාත්‍ය මණ්ඩල රැස්වීමේ දී ගාසා තීරයෙහි පවත්නා යුධමය තත්ත්වය හේතුවෙන් එම ප්‍රදේශයේ සිරවී සිටින මිලියනයකට ආසන්න ළමුන්ගේ අත්‍යවශ්‍ය වියදම් පියවා ගැනීම සඳහා මූල්‍යාධාර ලබා දීම පිණිස ශ්‍රී ලංකා රජයෙන් ඇමරිකානු ඩොලර් මිලියනයක මුදලක් ප්‍රදානය කිරීමට අමාත්‍ය මණ්ඩල අනුමැතිය හිමි විය.

අමාත්‍යාංශ සහ රජයේ ආයතන පසුගිය ඉෆ්තාර් සැමරුම පැවැත්වීමට වෙන් කර තිබූ ප්‍රතිපාදන ද මෙම අරමුදල වෙත ලබා දෙන ලෙස ජනාධිපතිවරයා කළ ඉල්ලීමට අනුව අරමුදල වෙත ලැබුණු ඇමරිකානු ඩොලර් මිලියනයක මුදල පළමු අදියර යටතේ 2024-04-01 දින පලස්තීන රජය වෙත පරිත්‍යාග කිරීම සිදු කෙරිණි.

එසේම ජනාධිපතිවරයා කළ ඉල්ලීම අනුව ව්‍යාපාරික ආයතන, විවිධ සංවිධාන හා පොදු මහජනතාව විශාල වශයෙන් එම අරමුදල සමඟ අත්වැල් බැඳගනු ලැබීය. ඒ අනුව 2024 ජූලි 31 දින දක්වා අරමුදල වෙත ලැබුණු ඇමෙරිකානු ඩොලර් පන්ලක්ෂ අනුදහසක (590,000/) මුදල ද මෙලෙස ඊයේ දින පලස්තීන රජය වෙත භාර දීම සිදු විය.

අරමුදල සඳහා දායකවීමේ අවස්ථාව 2024 ජූලි 31 දිනෙන් අවසන් කෙරුණු අතර ඒ සමඟ මානුෂිකත්වයෙන් අත්වැල් බැඳ ගත් සියලු ජනතාවට ජනාධිපති රනිල් වික්‍රමසිංහ මහතාගේ සහ ජනාධිපති කාර්යාලයේ ස්තූතිය පිරිනමයි.

සටහන – රෂිකා හෙන්නායක ජුනි 23 , කොළඹ (LNW):

ගාසා තීරයේ විපතට පත් ජනතාව වෙනුවෙන් නව කාත්තන්කුඩි ග්‍රෑන්ඩ් ජුම්මා මුස්ලිම් පල්ලියේ අද (23) සංවිධානය කර තිබූ විශේෂ යාඥා මෙහෙයට එක්වෙමින්, ගාසා තීරයේ ගැටුම් පිළිබඳ ශ්‍රි ලංකාවේ ස්ථාවරත්වය කිසි විටෙකත් වෙනස් නොවන බවත්, වසර 05ක් තුළ පලස්තීන රාජ්‍ය පිහිටුවිය යුතුය යන්න ශ්‍රී ලංකාවේ ස්ථාවරය වන බවත් ජනාධිපති රනිල් වික්‍රමසිංහ මහතා පැවසීය.

හරිත් මවුලවිතුමන් විසින් යාඥා මෙහෙය සිදු කළ අතර, ගාසා හි ගැටුම්වලින් විපතට පත් දරුවන්ට සහන සැලසීම වෙනුවෙන් ජනාධිපති රනිල් වික්‍රමසිංහ මහතාගේ උපදෙස් පරිදි ආරම්භ කළ ගාසා හි ළමා අරමුදලට (Children of Gaza Fund) නව කාත්තන්කුඩි ග්‍රෑන්ඩ් ජුම්මා මුස්ලිම් පල්ලිය විසින් රුපියල් එක්කෝටි හත් ලක්ෂ හැට නව දහස් හාරසිය දාහතක (10,769,417) ක මුදලක් පරිත්‍යාග කිරීමට අදාළ චෙක්පත ද භාරකාරීත්ව මවුලවිතුමන්ලා විසින් මෙහිදී ජනාධිපතිවරයා වෙත පිළිගැන්වනු ලැබීය,

මෙම විශේෂ යාඥා මෙහෙයට එක්ව සිටි බැතිමතුන් සමඟ සුහද කතාබහකට ද එක් වූ ජනාධිපතිවරයා ඔවුන් සමඟ සෙල්ෆි ඡායාරූප කිහිපයකට ද පෙනි සිටීම විශේෂත්වයකි.

මෙහිදී අදහස් දැක්වූ ජනාධිපති රනිල් වික්‍රමසිංහ මහතා වැඩිදුරටත් මෙසේද පැවසීය,

“මම මඩකලපුව ප්‍රදේශයේ සංචාරයක නිරතව සිටියදී මෙම අවස්ථාව සඳහා ද ආරාධනා කිරීම පිළිබඳව ඔබ සියලුදෙනාට ස්තුතිවන්ත වෙනවා.මෙම පල්ලිය මුස්ලිම් චිත්‍ර කලාවේ හොදම උදාහරණයක් ලෙස දැක්විය හැකියි.කාත්තන්කුඩි මුස්ලිම් ජනතාව රජකාලයේ සිට එහි ජිවත්වු පිරිසක්. මම මඩකලපුව ප්‍රදේශයට පැමිණියේ මෙහි සංවර්ධන කටයුතු පිළිබඳ සාකච්ඡා කිරීමටයි.මෙම පළාතේ කෘෂිකර්මය නවීකරණය කිරීමට මෙන්ම සංචාරක ව්‍යාපාරය දියුණු කිරිමට අප බලාපොරොත්තු වෙනවා.

ඒ වගේම අධ්‍යාපනය ද දියුණු කළයුතුයි.අද මට මෙම අවස්ථාවට ආරාධනා කරනු ලැබුවේ ගාසා අරමුදල සඳහා ඔබගේ සහාය ලබාදීමටයි.ගාසා ප්‍රශ්නය පිළිබඳ ආණ්ඩුව දැඩි ස්ථාවරයක සිටිනවා. එය කිසිඳු අවස්ථාවක වෙනස් වන්නේ නැහැ.ඊශ්‍රාලයට හමාස් සංවිධානය සමග ප්‍රශ්න තිබෙනවා නම් ඒ වෙනුවෙන් ගාසා වැසියන්ගෙන් පලි ගන්න එපා.අපට තිබෙන්නේ පලස්තීනයට විසඳුම් සොයා ගැනීමට සහාය වීමයි. අපේ ස්ථාවරය නම් වසර 05ක් තුළදී පලස්තීන රාජ්‍යය ඇති කිරීමට අවශ්‍ය බවයි.

කාලසීමාවක් නැතිව කතා කර ඵලක් නැහැ. මොකද වසර 40ක්, 50ක් මේ පිළිබඳ කතා කළා.එම නිසා අප කාලසීමාවක් අනුව එම වැඩකටයුතු සිදු කළ යුතුයි.ඊශ්‍රාලයට තමන්ගේ ආරක්ෂාව පිළිබඳ ප්‍රශ්නයක් තිබෙනවා නම් එය වෙනම කතා කළ හැකියි.නමුත් පලස්තීන රාජ්‍යය ඇති කළ යුතුයි. සාමාන්‍ය ජනතාව විශාල පිරිසක් ඝාතනයට ලක්ව තිබෙනවා.ඒ පිළිබඳ අප කම්පාවට පත් වෙනවා.අපට කිසිසේත් එය අනුමත කළ නොහැකියි.

ගාසා යුද්ධයෙන් පීඩාවට පත් දරුවන් වෙනුවෙන් ගාසා අරමුදල ආරම්භ කිරීමට ශ්‍රී ලංකා රජය තීරණය කළා.ඒ අනුව පළමුව ඩොලර් මිලියනයක් ලබාදීමට කටයුතු කළා. අප කුඩා රටක් වුවත්, බංකොළාත් වූ රටක් ලෙස නම් කර තිබුණත් ඒ වෙනුවෙන් ඩොලර් මිලියනක මුදලක් ලබා දුන්නා.ඒ සඳහා ආධාර කරන ලෙස අප සාමාන්‍ය ජනතාවගෙන් ඉල්ලා තිබෙනවා.ඒ අනුව ඔබ ලබාදුන් මෙම පරිත්‍යාගය වෙනුවෙන් මගේ ස්තූතිය පළ කරනවා.ඒ වගේම භූමිදානය කිරීමේ ප්‍රශ්නය මෙරට මුස්ලිම් ජනතාවට විශාල ගැටළුවක්ව පැවතුනා.

එහිදී ලෝක සෞඛ්‍ය සංවිධානයේ වැඩසටහන ක්‍රියාත්මක නොකර වෙනම කොමිටියක් පත් කරනු ලැබුවා.එහිදී ප්‍රශ්නයක් මතු වුණා.ඒ පිළිබඳ මුස්ලිම් ජනතාව තුළ විශාල සිත් රිදීමක් ඇති වුණා.ඒ නිසා තමන්ගේ කැමැත්ත පරිදි භූමිදානය කිරීමට හෝ ආදාහනය කිරීමට, කැමතිනම් වෛද්‍ය පීඨයට දේහය භාරදිය හැකි අන්දමින් අලුත් නීතියක් ගෙන ඒමට ආණ්ඩුව තීරණය කළා.ඒ නිසා ඉදිරියේදි එවැනි ප්‍රශ්න ඇති නොවන ලෙස අප විසදුම් ලබා දී තිබෙනවා.

මම ප්‍රමුඛත්වය දී තිබෙන්නේ රටේ කඩා වැටුණු ආර්ථිකය යථා තත්ත්වයට ගෙන ඒමටයි.අපට තව ඉතා කෙටි කළකින් එම අරමුණ ඉටුකරගත හැකියි. ඉන් පසුව රටේ අනෙකුත් ප්‍රශ්න විසදා ගැනීම පිළිබඳ අවධානය යොමු කරනවා.ඒ වගේම ජනතාවට සින්නක්කර ඉඩම් අයිතිය ලබාදීම වෙනුවෙන් උරුමය වැඩසටහන ක්‍රියාත්මක කර තිබෙනවා.” ලෙස ජනාධිපතිවරයා පැවසීය.