ශ්‍රී ලංකා විදේශ සේවා නියුක්ති කාර්යාංශයෙන් මහා භාණ්ඩාගාරයට රුපියල් බිලියන තුනක චෙක්පතක් කම්කරු හා විදේශ රැකියා අමාත්‍ය මනුෂ නානායක්කාර මහතා විසින් ජනාධිපති රනිල් වික්‍රමසිංහ මහතා වෙත ජනාධිපති කාර්යාලයේ දී භාර දීම සිදුව තිබේ.
මෙම මුදල වෙන්කර තිබෙන්නේ, රටේ වත්මන් ආර්ථික තත්ත්වය සැලකිල්ලට ගෙන අත්‍යාවශ්‍ය ඖෂධ මිලදී ගැනීම, රාජ්‍ය සේවක වැටුප් ගෙවීම, වී මිලදී ගැනීම ආදී අත්‍යාවශ්‍ය කටයුතු වෙනුවෙන් ශ්‍රී ලංකා විදේශ සේවා නියුක්ති කාර්යාංශය විසින් ඉකුත් වසරේ ලැබූ මෙහෙයුම් අතිරික්තයෙන් බව සඳහන්.
මේ අන්දමින් විදේශ සේවා නියුක්ති කාර්යාංශය විසින් මීට ඉහත අවස්ථාවලදී මහා භාණ්ඩාගාරය වෙත ලබා දී ඇති මුළු මුදල රුපියල් මිලියන 3,382 ක මුදලක් ලබා දී ඇත.
නමුත් එකවර රුපියල් බිලියන 03 ඉක්මවූ මුදලක් භාණ්ඩාගාරය වෙත ලබා දුන් පළමු අවස්ථාව මෙය වීම විශේෂත්වයකි.
මීට අමතරව, විදේශ සේවා නියුක්ති කාර්යාංශය විසින් පිළිකා රෝහලට අවශ්‍ය ඖෂධ මිලදී ගැනීමට රුපියල් මිලියන 500ක ප්‍රදානයක් සිදු කිරීමට පියවර ගෙන ඇති අතර ඉන් රුපියල් මිලියන 100 කට අදාළ චෙක්පත ද මෙහිදී ජනාධිපතිවරයාට පිළිගැන්වීම ද සිදුවිය.
ජනාධිපතිවරයා විසින් එම චෙක්පත සෞඛ්‍ය අමාත්‍ය කෙහෙළිය රඹුක්වැල්ල මහතා වෙත බාර දීම ද සිදුවිය.
රෂිකා හෙන්නායක
