සටහන – රෂිකා හෙන්නායක
ජනවාරි 26 ලෝකය (අවුට්බවුන්ඩ් ටුඩේ):අද(26) දින ඉන්දියාව 75 වැනි ජනරජ දිනය සමරයි.
එහි තේමාව, වික්සිත් භාරත් හෙවත් සංවර්ධිත ඉන්දියාවක් යන්නයි.
මෙවර ඉන්දීය ජනරජ දින උළෙලේ ප්‍රධාන ආරාධිතයා ලෙස ප්‍රංශ ජනාධිපති එම්මෑනුවෙල් මැක්‍රෝන් සහභාගී වෙන බව වාර්තා වේ.
1947 බ්‍රිතාන්‍ය කිරීටයෙන් නිදහස ලැබූ ඉන්දියාව ස්වකීය ආණ්ඩුක්‍රම ව්‍යවස්ථාවක් සම්පාදනය කර එය ක්‍රියාත්මක කරන්නේ, 1950 වසරේ ජනවාරි 26 වැනිදා සිටයි. ස්වාධීන රාජ්‍යයක් ලෙස නැගී සිටීම සමරමින් එදින සිට ඉන්දියාව වාර්ෂිකව ජනරජ දිනය සමරයි.
නවදිල්ලි නුවර රාජ්පාත්හි පැවැත්වෙන මෙවර ජනරජ දින පෙළපාලිය, හමුදා උත්තමාචාර, සංස්කෘතිකාංග ඇතුළු විචිත්‍රාංග රැසකින් සමන්විත වන අතර, 77,000 කට අසුන් ගත හැකි එහි ජනතාව වෙනුවෙන් පනවා ඇති ආසන සංඛ්‍යාව 42,000 කි.
ඉන්දියාවේ අභිමානවත් පුරවැසියන් වෙනුවෙන් මෙවරත් භාරත රත්න, පද්ම ශ්‍රී සහ පද්ම භූෂණ ගෞරව සම්මාන පිරිනැමීමට නියමිත බවද වාර්තා වේ.
