සටහන – රුවන් නෙළුගොල්ල
මාසයකට ඇමරිකානු ඩොලර් ලක්ෂ 9ක් බැගින් බදුකුලී ගෙවමින් පසුගිය වසර තුනක් තිස්සේ බිම්ගත කර තිබුණු ශ්‍රී ලංකන් ගුවන් සේවයට අයත් ගුවන් යානා තුන අතරින් එකක් මේ වනවිටත් අලුත්වැඩියා කර යළි ගුවන් ඇණියට එකතු කර ඇති බව ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍ය බිමල් රත්නායක මහතා පවසයි.
ශ්‍රී ලංකන් ගුවන් සේවයේ නව සභාපති සරත් ගනේගොඩ මහතා ඇතුළු නව නායකත්වයේ මෙහෙයවීමෙන් මෙසේ ගුවන් සේවය දියුණු කරමින් මුදල් උපයාගෙන එම ආයතනය නඟා සිටුවීමේ කටයුතු සිදුකෙරෙන බවයි අමාත්‍යවරයා සඳහන් කළේ.
“ශ්‍රීලංකන් ගුවන් සමාගම වහලා, විකුණලා, විනාශ කරලා තිබුණේ. ඒ වගේම මගේ දැනීමේ හැටියට ශ්‍රීලන්කන් ගුවන් සේවයට අයත් යානා තුනක් අවුරුදු 03ක් තිස්සේ ග්‍රවුන්ඩ් කරලා තිබුණා එන්ජිම නැතුව. අවුරුදු 03ක් තිස්සේ මාසයකට ඩොලර් ලක්ෂ 09 ගාණේ යානා බිම තියාගෙන ගෙව්වා රනිල්ලාගේ පසුගිය ආණ්ඩු. එහෙම තමයි ඒ අය හොඳටම කළේ. දැන් මම දන්න තරමින් ගනේගොඩ මහතා ඇතුළු අලුත් නායකයෝ ඇවිල්ලා ඒ අය යම් ආකාරයකට මුදල් හොයාගෙන බිම තියෙන යානාවලින් එකක් දැනට ඔපරේට් වෙනවා, තව දෙකක් ඒ අය අප්‍රේල්වලට කලින් ඔපරේට් කරන්න යනවා. ඉතින් ඒ නිසා ඒ අය ශ්‍රී ලංකන් ගුවන් සමාගම විකුණන්නේ නැතිව ඉදිරියට යන්න සැලැස්මක ඉන්නේ”
අමාත්‍ය බිමල් රත්නායක මහතා මේ බව පැවසුවේ වරාය හා සිවිල් ගුවන්සේවා අමාත්‍යංශයේ පැවති සාකච්ඡාවකින් අනතුරුව මාධ්‍ය වෙත අදහස් දක්වමිනි.
