මැතිවරණ අපේක්ෂාවන් ශ්‍රී ලංකාවේ අවවරප්‍රසාදිතයන් සඳහා ශුභවාදී හැඟීම් දල්වයි – චරිත් ගුණවර්ධන

කොළඹ LNW: මහ මැතිවරණයක අවතාරය ශ්‍රී ලංකාව පුරා පැතිර යද්දී, දේශපාලන ප්‍රභූ පැළැන්තිය සහ ආර්ථික වශයෙන් බලවතුන් භීතියක ග්‍රහණයට ලක් වී ඇත.

එවැනි මැතිවරණයකින් ඇති විය හැකි පෙරළියක් ගැන අනුමානවලින් මෑත කාලීන පුවත්පත් ලිපි පිරී තිබේ. කෙසේ වෙතත්, ඔවුන්ගේ භීතිය මධ්‍යයේ, විශේෂයෙන්ම ශ්‍රී ලංකාවේ දිළිඳු ජනතාව සඳහා මැතිවරණ බලාපොරොත්තුවේ පහන් ටැඹක් සේ පෙනී සිටින බව හඳුනා ගැනීම ඉතා වැදගත් වේ.

මහ මැතිවරණයක් පිළිබඳ අපේක්ෂාව බල කොරිඩෝව හරහා කම්පන තරංග යවා ඇත්තේ, මූලික වශයෙන් එය තෝරාගත් කිහිප දෙනෙකු විසින් භුක්ති විඳින මුල් බැසගත් වරප්‍රසාද බිඳ දැමීමට තර්ජනය කරන නිසාය. පවතින ආර්ථික හා ණය අර්බුදයන් ජාතිය පීඩාවට පත් කරමින් තිබියදීත්, සමාජයේ සැලකිය යුතු කොටසක් දූෂණයෙන්, වැරදි කළමනාකරණයෙන් සහ දුර්වල පාලනයෙන් පිරී ඇති පද්ධතියකින් දිගටම ප්‍රතිලාභ ලබති.

දිගු කලක් තිස්සේ ධනවතුන්ගේ සහ බලගතු අයගේ අවශ්‍යතා බහුතරයේ අවශ්‍යතා යටපත් කර ඇත. රාජ්‍ය අංශය පෞද්ගලික න්‍යාය පත්‍රවලට සේවය කිරීම සඳහා අවභාවිතයට ලක්ව ඇත්තේ, අසමානතාවයේ සහ ඡන්ද බලය අහිමි කිරීමේ චක්‍රයක් චිරස්ථායී කරමිනි. කෙසේ වෙතත්, එළඹෙන මැතිවරණය මෙම රැල්ල ආපසු හැරවීමට සහ වඩාත් සාධාරණ ශ්‍රී ලංකාවක් සඳහා මාවත විවර කිරීමට අවස්ථාවක් ලබා දෙයි.

මූලික කරුණ වන්නේ ශ්‍රී ලංකාවේ ජනගහනයෙන් බහුතරයක් මුහුණ දෙන සම්පූර්ණ යථාර්ථයයි. ඔවුන් කුසගින්න, මන්දපෝෂණය, ප්‍රමාණවත් නොවන සෞඛ්‍ය සේවා, අවිනිශ්චිත රැකියා සහ සොච්චම් වැටුප් සමඟ පොරබදන විට අවිනිශ්චිතතාවය විශාල වේ. “පහළට-කාන්දුවීමේ ආර්ථික විද්‍යාව” පිලිබඳ වාචාල කතා නොතකා, ප්‍රභූ පැළැන්තිය විසින් රැස් කරන ලද ධනය, ආර්ථික වශයෙන් අවාසි සහගත අයගේ දුක්ඛිත තත්වය සමනය කිරීමට අසමත් වී ඇත. නිදසුනක් වශයෙන්, තේ වතු කම්කරුවන්ගේ පරම්පරා ගණනාවක්, ජාතියේ ආර්ථිකයට ඔවුන්ගේ දායකත්වය නොතකා දුෂ්කරතා විඳදරා ගැනීම කරගෙන යති.

ජාත්‍යන්තර මූල්‍ය අරමුදලේ බෙහෙත් වට්ටෝරු මගින් මෙහෙයවනු ලබන, ආර්ථික ප්‍රකෘතිය සඳහා වන වත්මන් ප්‍රවේශය අකාර්යක්ෂම බව සහ ජනතාවගේ යහපැවැත්මට අහිතකර බව ඔප්පු වී ඇත. සැබෑ මානව සංවර්ධනයට වඩා ආර්ථික වර්ධනයට සහ දළ දේශීය නිෂ්පාදිතයට ප්‍රමුඛත්වය දීමෙන්, මෙම ප්‍රතිපත්ති අසමානතා උග්‍ර කරන අතර සමාජ බෙදීම් ගැඹුරු කරයි. එපමණක් නොව, දරිද්‍රතාවයේ සහ ආර්ථික අස්ථාවරත්වයේ මූලික හේතු සමග පොර බැදීමට ඔවුන් අසමත් වේ.

නිව්‍යෝර්ක් සහ ලන්ඩන් වැනි ධනවත් නගර තුළ පවා පවතින දැඩි ගෝලීය අසමානතාවය සහ නොනැසී පවතින දරිද්‍රතාවය, සමාජ හා පාරිසරික පරිහානිය අවම කිරීම සඳහා විකල්ප ප්‍රවේශයන් ගවේෂණය කිරීමේ අත්‍යවශ්‍ය බව අවධාරනය කරයි. හුදෙක් අතීත අසාර්ථකත්වයන්ට ඇඟිල්ල දික් කරමින් වත්මන් ආර්ථික සුසමාදර්ශයන්ට විකල්ප බැහැර කිරීම, බුද්ධිමය වශයෙන් අන් අදහස් නොසළකා හරින්නක් වන අතර නව්‍ය විසඳුම් සෙවීමේ ප්‍රගතියට බාධා කරයි.

ශ්‍රී ලංකාවේ විදේශ ණය බර වත්මනේ පවතින ආර්ථික ආකෘතියේ දෝෂ සහිත ස්වභාවය පිළිබඳ සාක්ෂියක් ලෙස සේවය කරයි. ලොව පුරා වරප්‍රසාද ලත් සුළුතරයක් පොහොසත් කිරීම සඳහා ගොඩගැසූ ණය බරට ජනතාව උරදීම අසාධාරණ ය. තවද, නීතිවිරෝධී මූල්‍ය ක්‍රියාකාරකම් සඳහා පහසුකම් සපයන ආර්ථික ක්‍රමයක් සහ සොරකම් කළ වත්කම් විදේශයන්හි රැකවරණ ලබා දෙන ආර්ථික ක්‍රමයක් විසින් ඇති කරන දුෂ්කරතා ඉවසිය නොහැක. ප්‍රතිගාමී බදු ප්‍රතිපත්ති ආමන්ත්‍රණය කිරීම සහ සමාජ සුබසාධන වැඩසටහන්වලට ප්‍රමුඛත්වය දීමේ වැදගත්කම අවධාරණය කිරීම සමාජයේ වඩාත් අවදානමට ලක්විය හැකි කොටස් නඟා සිටුවීම සඳහා අත්‍යවශ්‍ය පියවර වේ.

පවතින සමාජ ආරක්ෂණ ජාලය අකාර්යක්ෂමතාවයෙන් පිරී ඇති අතර, බොහෝ සුදුසුකම් ලත් පුද්ගලයින්ට සහායක් නොදී ඔවුන් අත්හැර දමයි. ළමුන්, වැඩිහිටියන් සහ ආබාධිතයන් සිටින පවුල් ඉලක්ක කරගත් විශ්වීය සමාජ ප්‍රතිලාභ වැඩසටහනක් මගින් අවශ්‍යතා ඇති අයට ජීවන මාර්ගයක් සැපයිය හැකිය. එවැනි යෝජනා ක්‍රමයක් මඟින් කිසිවකු පද්ධතියේ හිඩැස්වලින් නොවැටෙන බව සහතික කරන අතර වැඩි වැඩියෙන් සියල්ලන් සංයුක්ත සමාජයක් සඳහා පියවරක් නියෝජනය කරනු ඇත.

වෙනත් බාධක අතර, සංකීර්ණ භූ දේශපාලනික ගතිකත්වයන්, අසාධාරණ ගෝලීය ආර්ථික ක්‍රමයක අස්ථාවරත්වය, දේශගුණ අර්බුදයේ ප්‍රතිවිපාක, පුහුණුශ්‍රමය අධික ලෙස පිටතට වහනය වීම, සහ නොවිසඳුණු ජනවාර්ගික ආතතීන් මගින් සංයුක්ත වූ ශ්‍රී ලංකාව පීඩාවට පත් කර ඇති දරුණු ආර්ථික හා ණය අර්බුදයෙන් ගැලවීම බලවත් අභියෝගයකි.

සාර්ව ආර්ථික පෙරමුණේ ප්‍රගතිශීලී ප්‍රතිපත්ති විකල්පයන් මිනිසුන්ගේ යහපැවැත්ම ස්ථාවර කිරීම සඳහා මාවතක් සපයයි. මෙම වැඩිදියුණු කිරීම් වේගවත් කිරීම සඳහා අත්‍යවශ්‍ය වන තීරණාත්මක නියාමන ප්‍රතිසංස්කරණ සඳහා පහසුකම් සැළසීමේ හැකියාව මැතිවරණවලට ඇත.

කෙසේ වෙතත්, 2024 මැතිවරණය ක්ෂිතිජයේ ඇති හෙයින්,ශ්‍රී ලංකාව සිය ආයතන සහ ආණ්ඩුකරණමය රාමු ශක්තිමත් කිරීමට ප්‍රමුඛත්වය දිය යුතුය. එහි පුරවැසියන්ගේ සුබසාධනයට ප්‍රමුඛත්වය දෙන ආර්ථිකයක් සැකසීම ඉලක්ක කරගත් අව්‍යාජ පද්ධතිමය වෙනසක්, ඔරොත්තු දෙන පාලන ව්‍යුහයන් පිහිටුවීම මත රඳා පවතී. ඡන්දදායකයාගේ ක්‍රියා ආකස්මික (නැතහොත් අහඹු පුද්ගල තේරීම්) නොවේ; ඒ වෙනුවට, ඒවා අර්ථවත් සහ කල්පවත්නා ප්‍රතිසංස්කරණ සඳහා වූ දැඩි අභිලාෂයක් සංකේතවත් කරයි.

ඉදිරි මහ මැතිවරණය ශ්‍රී ලංකාවේ දිළිඳු බහුතරය සඳහා පොරොන්දුවකි. එය මුල් බැසගත් බල ව්‍යුහයන්ට අභියෝග කිරීමට, සමාජ සුබසාධනයට ප්‍රමුඛත්වය දීමට, සහ දිළිඳු බහුතරයද ඇතුළත් කරගන්නා වර්ධනය සහ සංවර්ධනය සඳහා නව ගමන් මඟක් සළසා ගැනීමට අවස්ථාවක් ඉදිරිපත් කරයි. ජාතිය සන්ධිස්ථානයක සිටින බැවින්, මේ මොහොත ග්‍රහණය කොට ගෙන සියලු ශ්‍රී ලාංකිකයින්ට දීප්තිමත් අනාගතයක් උදාකර දීම අත්‍යවශ්‍ය වේ.

” Electoral prospects spark optimism for Sri Lanka’s underprivileged ” යන හිසින් 2024 පෙබරවාරි 2 වෙනිදා ඩේලි ෆයිනැන්ෂියල් ට්යිම්ස් පුවත් පතෙහි පළ වූ ලිපියේ සිංහල පරිවර්තනයකි.

පරිවර්තනය – කතිකා

(ලේඛකයා දේශපාලන ආර්ථිකය පිළිබඳ ආයතනයේ (www.ipe-sl.org) සම-නිර්මාතෘවරයෙකු වන අතර එක්සත් රාජධානියේ ලන්ඩන් සඳහා (හිටපු) තේරී පත් වූ ප්‍රාදේශීය මන්ත්‍රීවරයෙකි.)