රෂිකා හෙන්නායක පෙබරවාරි 05, කොළඹ (LNW):
මේ වන විටත් මත්තල ජාත්‍යන්තර ගුවන්තොටුපොළ වාර්ෂිකව රුපියල් බිලියන 3.2ක පාඩුවක් ලබන බව වරාය හා ගුවන් සේවා අමාත්‍යංශය පවසයි. එම පාඩුව අවම කිරීම සඳහා මේ වනවිට සැලසුම් සකස් කරමින් සිටින බව නියෝජ්‍ය අමාත්‍ය රුවන් කොඩිතුවක්කු මහතා සඳහන් කළේය.
ඒ අනුව මත්තල ගුවන්තොටුපොළට පැමිණෙන යානා ගොඩබැස්වීමේ ගාස්තුවෙන් නිදහස් කිරීමට තීරණය කර ඇති බව ඔහු ප්‍රකාශ කළ අතර, නව තීරණයක් සමග ගුවන් සමාගම් 06ක් මත්තල ගුවන්තොටුපොළට සිය යානා ගොඩබැස්වීමට එකඟතාව පළ කර තිබෙන බව පැවසේ. මත්තල ගුවන්තොටුපොළේ වාර්ෂික මගී මෙහෙයුම් ධාරිතාව ලක්ෂ 10 ක් බවද වාර්තා වේ.
එහෙත් මේ වනවිට මත්තල ගුවන්තොටුපොළට පැමිණෙන්නේ වාර්ෂිකව මගීන් ලක්ෂයක් පමණක් බව නියෝජ්‍ය අමාත්‍යවරයා පෙන්වා දුන් අතර ,එම සංඛ්‍යාව මේ වසරේදී ලක්ෂ 2ක් දක්වා ඉහළ නැංවීමට සැලසුම් කර ඇති බව ඔහු සඳහන් කළේ ය.
මත්තල ගුවන්තොටුපොළ වටා ඇති 17 KM ක් දිග ආරක්ෂිත වැටද අබලන් වී ඇති බවත්, එය නවීකරණය කර ගුවන්තොටුපොළේ ආරක්ෂාව තහවුරු කිරීමටද පියවර ගන්නා බවත්, රුවන් කොඩිතුවක්කු මහතා වැඩිදුරටත් කියා සිටියේය.
