හිටපු නියෝජ්‍ය අමාත්‍ය පාර්ලිමේන්තු මන්ත්‍රී සරණ ගුණවර්ධන මහතාට අද (07) කොළඹ මහාධිකරණය හමුවේ අධිචෝදනා භාර දී තිබූ අතර කොළඹ මහාධිකරණ විනිසුරු අමල් රණරාජා මහතා නියෝග කළේ, සැකකරු රුපියල් 50,000 ක මුදල් සහ රුපියල් ලක්ෂ පහ බැගින් වූ ශරීර ඇප දෙකක් මත මුදා හැරීමටයි.
අල්ලස් හෝ දූෂණ විමර්ශන කොමිෂන් සභාව විසින් පවරා තිබූ නඩුවට පෙනී සිටින ලෙස දන්වා අධිකරණය විසින් නිකුත් කළ නොතීසි නියෝග අනුව ඔහු අද අධිකරණය හමුවේ පෙනී සිටි අතර ඔහුට විදේශගත වීම වළක්වන නියෝගයක් නිකුත් කළ විනිසුරුවරයා ඔහුගේ විදේශ ගමන් බලපත්‍රය අධිකරණයට භාර දෙන ලෙසට ද නියෝග කර ඇත.
එමෙන්ම ඔහුගේ ඇඟිලි සලකුණු ලබාගෙන පෙර වැරදි වාර්තාවක් කැඳවන ලෙසට ද මහාධිකරණ විනිසුරුවරයා නියෝග කළ අතර මෙම නඩුව පවරා ඇත්තේ සංවර්ධන ලොතරැයි මණ්ඩලයේ සභාපතිවරයා ලෙස කටයුතු කරමින් සිටියදී සරණ ගුණවර්ධන මහතා එම මණ්ඩලයට අවශ්‍ය වාහන කුලී පදනම මත ලබා ගැනීමේදී නිසි ක්‍රියාපටිපාටිය අනුගමනය නොකිරීමට අදාළවයි . නැවත එම නඩුව මැයි 4 වෙනි දින කැඳවනු ඇත.
රෂිකා හෙන්නායක
