ඊයේ (09) අනුරාධපුර සල්ගාදු පිටියේදී පැවැත්වූ ශ්‍රී ලංකා පොදුජන පෙරමුණේ දැවැන්ත රැලියේදී අග්‍රාමාත්‍ය මහින්ද රාජපක්ෂ මහතාගේ වටිනා ඔරලෝසුවක් අස්ථානගත වී ඇති බවට පැතිර යන පුවත් සම්පූර්ණයෙන්ම අසත්‍ය බව ආරංචිමාර්ග පවසයි.
එම රැලියෙහි වේදිකාව මතදී වරාය හා නාවික කටයුතු අමාත්‍ය රෝහිත අබේගුණවර්ධන මහතා අග්‍රාමාත්‍ය මහින්ද රාජපක්ෂ මහතාගේ අතින් අල්ලා එසවීමට උත්සාහ දරා තිබුණු අතර එයින් මහින්ද රාජපක්ෂ මහතා කෝපයට පත්ව අත ගසාදමන අයුරු දැක්වෙන වීඩියෝවක් සමාජ මාධ්‍ය ඔස්සේ විශාල වශයෙන් සංසරණය විය.
අග්‍රාමාත්‍යවරයාගේ ඔරලෝසුව නැතිවී ඇති බවට සමාජ මාධ්‍ය ජාල තුළ පුවතක් පැතිර ගියේ මෙම වීඩියෝවෙන් අනතුරුව ය.
කෙසේවෙතත් එම පුවත සම්පූර්ණයෙන්ම අසත්‍ය බවයි අග්‍රාමාත්‍යවරයාට සමීප ආරංචිමාර්ග තරයේ ප්‍රකාශ කළේ.
විශේෂයෙන්ම රෝහිත අබේගුණවර්ධන අමාත්‍යවරයාගේ අන්වර්ථ නාමය “රත්තරං” නිසා කවුරුත් සිටියේ වැඩි අවධානයකිනි.
RN
