හිටපු මහබැංකු අධිපති අජිත් නිවාඩ් කබ්‍රාල් මහතාට එරෙහිව පනවා ඇති විදෙස් ගමන් තහනම තාවකාලිකව අත්හිටුවීමට කොටුව මහේස්ත්‍රාත් අධිකරණය ඊයේ (19) නියෝග කර තිබේ.
ඇමරිකාව තුළ ශ්‍රී ලංකාවේ ප්‍රවර්ධන කටයුතු සඳහා ඇමරිකානු ඩොලර් මිලියන 6.5 ක මුදලක් ගිවිසුම්ගත පාර්ශ්වයට නොගෙවා වෙනත් පාර්ශ්වයකට ගෙවීම සම්බන්ධයෙන් අජිත් නිවාඩ් කබ්‍රාල් මහතාට සහ 2014 වසරේ ශ්‍රී ලංකා මහබැංකුවේ මුදල් මණ්ඩලය ඇතුළු නිලධාරීන්ට එරෙහිව තීනියාවල පාලිත හිමියන් ගොනුකර ඇති නඩුවකට අදාළව මෙම විදෙස් ගමන් තහනම පනවා තිබිණි.
වෛද්‍ය ප්‍රතිකාර ගැනීම සඳහා තමන්ට විදෙස්ගත වීමට අවශ්‍ය හෙයින් මෙම විදෙස් ගමන් තහනම තාවකාලිකව ඉවත් කරන ලෙස ඊයේ දිනයේදී අජිත් නිවාඩ් කබ්‍රාල් මහතා මෝසමක් මාර්ගයෙන් අධිකරණයෙන් ඉල්ලීමක් කළ අතර එම ඉල්ලීම සලකා බැලූ කොටුව මහේස්ත්‍රාත් තිලිණ ගමගේ මහතා රුපියල් මිලියන 100ක ශරීර ඇපයක් මත එම විදෙස් ගමන් තහනම මාර්තු 02 වනදා දක්වා අත්හිටුවීමට නියම කළේය.
RN
