සටහන: සශිකලා මධුෂාණි
මැයි 15; ලෝකය(අවුට්බවුන්ඩ් ටුඩේ): ඊයේ(14)දිනයේදී චීන ජනාධිපති ෂි ජින්පින් හා පැවති සාකච්ජා වලදී ඉරානයට ආයුධ විකිණීම නැවත්වීමට එකඟත්වයකට පැමිණි බව එක්සත් ජනපද ජනාධිපති ඩොනල්ඩ් ට්‍රම්ප් සඳහන් කර තිබේ.
ෆොක්ස් නිවුස් සමඟ පැවති සම්මුඛ සාකච්ඡාවකට එක්වෙමින් මේ බව සඳහන් කර එක්සත් ජනපද ජනාධිපතිවරයා වැඩිදුරටත් ප්‍රකාශ කර තිබුණේ, චීනයට හෝමූස් සමුද්‍ර සන්ධිය නැවත විවෘත කිරීමට අවශ්‍ය බවත්, සමුද්‍ර සන්ධිය හමුදාකරණය කිරීමට සහ එහි භාවිතය සඳහා ගාස්තු අය කිරීමට ගන්නා ඕනෑම උත්සාහයකට චීනය තදින්ම විරුද්ධ බවත්, අනාගතයේදී චීනය සමුද්‍ර සන්ධිය මත යැපීම අඩු කිරීම සඳහා ඇමරිකානු තෙල් මිලදී ගැනීමට එකඟ වූ බවත්ය.
චීනය අවස්ථා ගණනාවකදී තමන් ඉරානයට ආයුධ සපයන බවට කරන චෝදනා ප්‍රතික්ෂේප කර තිබු අතර චීන ජාතික ආරක්ෂක අමාත්‍යාංශයේ ප්‍රකාශක ෂැං ෂියාඕගැන්ග් සඳහන් කර තිබුණේ, අසත්‍ය තොරතුරු පැතිරවීමට අපි විරුද්ධවන බවයි.
