එක්සත් ජාතික පක්ෂ නායක රනිල් වික්‍රමසිංහ මහතා අගමැති තනතුරට පත්වූයේ නීත්‍යනුකූලව බව එජාප මහ ලේකම් පාලිත රංගෙ බණ්ඩාර මහතා පවසනවා. රනිල් වික්‍රමසිංහ මහතා අගමැති තනතුරට පත්වීම නීතිවිරෝධී ක්‍රියාවක් හා සම්ප්‍රදාය කඩ කිරීමක් ලෙස ඇතැම් පාර්ශ්ව ප්‍රකාශ කළද සියල්ල සිදුවූයේ ආණ්ඩුක්‍රම ව්‍යවස්ථාව අනුව බවද ලේකම්වරයා පවසනවා.
ආණ්ඩුක්‍රම ව්‍යවස්ථාවේ 37 වැනි වගන්තිය කියවීමෙන් එය තහවුරු කරගත හැකි බවද රංගෙ බණ්ඩාර මහතා සඳහන් කරයි.
එජාප නායකයා අගමැති තනතුර ඉල්ලා නොසිටි බවත්, ජනාධිපතිවරයාගේ ආරාධනාවකට අනුව එම තනතුරට පත් වූ බවත් ඔහු පවසනවා. රට බේරා ගන්නා ලෙස ජනාධිපතිවරයා සිදුකළ ඉල්ලීම ඉවත දැමීමට වගකිව යුතු පක්ෂ නායකයෙකු ලෙස රනිල් වික්‍රමසිංහ මහතාට නොහැකි බවද එජාප ලේකම්වරයා සඳහන් කරනවා.
මහින්ද රාජපක්ෂ මහතා අගමැති තනතුර අතහැරීමෙන් පසුව ජනාධිපතිවරයා විසින්, අගමැති තනතුර බාර ගන්නැයි විපක්ෂ නායකයා ඇතුළු පාර්ශ්ව රැසකට ආරාධනා කළ නමුත් ඒ සියලු පාර්ශ්ව එම ඉල්ලීම නොසලකා හැරි බව පෙන්වා දෙන එජාප ලේකම්වරයා පවසන්නේ රනිල් වික්‍රමසිංහ මහතා පමණක් එම ආරාධනාව බාරගත් බවයි.
අගමැති තනතුරට පත්වන්නැයි ආරාධනා කළවිට, විවිධ කොන්දේසි ඉදිරිපත් කරමින් එය ප්‍රතික්ෂේප කළ සමගි ජන බලවේගය, දැන් රනිල් වික්‍රමසිංහ මහතා අගමැති තනතුර බාරගත් පසු සහාය දීම වෙනුවට විවිධ බාධා එල්ල කරමින් සිටින බවද පාලිත රංගෙ බණ්ඩාර මහතා පවසනවා.
සජිත් ප්‍රේමදාස මහතා ඉදිරිපත් කළ කොන්දේසි ඉටු කරන තෙක් බලා සිටියේ නම් ශ්‍රී ලංකාවක් සොයා ගැනීමටවත් නොහැකි වනු ඇති බවත්, ආණ්ඩුවක් නොමැතිව රටකට ඉදිරියට ගමන් කළ නොහැකි බවත් එජාප ලේකම්වරයා වැඩිදුරටත් ප්‍රකාශ කරනවා.
UN
