- ඩිජිටල් වේදිකා තුළ ක්‍රියාත්මක වන අන්තර්ජාල අලෙවිකරුවන්ගේ සහ විකුණුම්කරුවන්ගේ ක්‍රියාකාරකම් නියාමනය කිරීම සඳහා පාරිභෝගික කටයුතු අධිකාරිය විශේෂ ගැසට් නිවේදනයක් නිකුත් කරයි: මෙමඟින් පාරිභෝගික අයිතීන් සුරැකීම අපේක්ෂා කරන අතර, මාර්ගගත ගනුදෙනුවල විවිධ අදියරයන්හිදී පාරිභෝගික සුරක්ෂිතතාවය තහවුරු කිරීම අපෙක්ෂා කරන බව ද එම අධිකාරියේ ප්‍රධානී ශාන්ත නිරිඇල්ල පවසයි.
- ඩිජිටල් ආර්ථිකයක් කරා ළඟා වීම කඩිනම් කිරීම පිළිබඳ සවිස්තර වාර්තාවක් මසක කාලයක් තුළ ලබා දෙන ලෙස ජනාධිපති රනිල් වික්‍රමසිංහ බලධාරීන්ට උපදෙස් දෙයි; ඩිජිටල්කරණ ක්‍රියාවලියේ ප්‍රමාදයන් වළක්වා ගැනීමේ වැදගත්කම සහ එය ක්‍රියාවට නැංවීම වේගවත් කිරීම තුළින් ලබා ගත හැකි ප්‍රතිලාභ පිළිබඳ අවධාරණය කරයි.
- උමාඔය ජල විදුලි බලාගාරයේ ඒකක දෙකක් මෙම වසරේ විදුලිය උත්පාදනය සඳහා ක්‍රියාත්මක කරන බව විදුලිබල හා බලශක්ති අමාත්‍ය කංචන විජේසේකර පවසයි: මෙමඟින් “ජාතික විදුලිබල පද්ධතියට මෙගාවොට් 120 ක සැලකිය යුතු ජල විදුලියක්” එක්කරනු ඇති බව පව ද පවසයි: 01 වන ඒකකය මෙම වසරේ අගෝස්තු මාස ද, 02 වන ඒකකය සැප්තැම්බර් මස ද ක්‍රියාත්මක වීම ආරම්භ වනු ඇත.
- ජනාධිපති මන්දිරයේ තිබී අරගලයේ ක්‍රියාකරුවන් විසින් සොයා ගනු ලැබූ විශාල මුදල් තොගයට අදාළව බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්ධු තෙන්නකෝන් ට එරෙහිව ගොනුකළ පෞද්ගලික පැමිණිල්ලට එරෙහිව එම ජ්‍යෙෂ්ඨ නියෝජ්‍ය පොලිස්පතිවරයා විසින් අභියාචනාධිකරණයේ ගොනුකළ රිට් පෙත්සම විභාගයට ගැනීම 2023 මැයි 22 දක්වා කල් යයි.
- ජාතික රණවිරු සැමරුම් උත්සවය බත්තරමුල්ල රණවිරු ස්මාරකය අභියසදී, සේනාධිනායක වශයෙන් ජනාධිපති රනිල් වික්‍රමසිංහ සහ අග්‍රාමාත්‍ය දිනේෂ් ගුණවර්ධනගේ ප්‍රධානත්වයෙන් පැවැත්වේ: මෙම වසර මැයි 19 වන දිනට තිස් වසරක් මුළුල්ලේ පැවති එල්ටීටීඊ ත්‍රස්තවාදය පරාජය කර වසර 14 ක් සපිරේ.
- සංචලතා අභියෝග සහිත පුද්ගලයන් සඳහා ජංගම ඡන්ද මධ්‍යස්ථාන පිහිටුවීමේ හැකියාව පිළිබඳව මැතිවරණ කොමිෂන් සභාව සලකා බලමින් සිටින බව එම කොමිසමේ සභාපති නිමල් පුංචිහේවා පවසයි: එවැනි පුද්ගලයන්ගේ ඡන්දය ඔවුන්ගේ නිවසට පැමිණීමෙන් පසු එකතු කරන බවත්, එවැනි ක්‍රියාමාර්ග ක්‍රියාත්මක කිරීම සඳහා වත්මන් මැතිවරණ නීති සංශෝධනය කළ යුතු බවත් පෙන්වා දෙයි.
- කොළඹ වරාය නගරයේ පස් අවුරුදු සැලැස්ම මඟින් ශ්‍රී ලංකාවට ඇ.ඩො. බිලියන 5.6 ක සෘජු විදේශ ආයෝජන අපේක්ෂා කරන බව වාර්තා වේ: මෙය, සේවා අපනයන කර්මාන්තයේ ප්‍රමුඛතම තරඟකරුවකු ලෙස වරාය නගරය සහ ශ්‍රී ලංකාව යන දෙකම ස්ථානගත කිරීමට උපකාරී වනු ඇති බව CHEC Port City නියෝජ්‍ය කලමනාකර අධ්‍යක්ෂ තුල්සි අලුවිහාරේ පවසයි: එමෙන්ම මෙමඟින් “කලාපයේ පළමු බහු-මුදල්, සේවා අපනයන විශේෂ ආර්ථික කලාපය ලෙස ක්ෂේත්‍රයේ ඉහළම මට්ටමේ ක්‍රියාකාරකම් කරා ළඟා වීමට අපේක්ෂා කරන” බව ද පවසයි.
- “ශ්‍රී ලංකාවේ අතීත යුධ තත්ත්වයට අදාළව කැනේඩියානු අග්‍රාමාත්‍ය ජස්ටින් ටෘඩෝ විසින් නිකුත් කරන ලද සමූලඝාතන පිළිබඳ සාහසික ප්‍රකාශය” අවිවාදයෙන් ප්‍රතික්ෂේප කරන බව මෙරට විදේශ කටයුතු අමාත්‍යංශය නිවේදනය කරයි: “ජාතියක නායකයකු විසින් සාමය සහ සංහිඳියාව ප්‍රවර්ධනය කරනු වෙනුවට මෙවැනි වගකීම් විරහිත ගැටුම් ඇතිකරනු ලබන ප්‍රකාශ ඔස්සේ දෙරට තුළ අසමඟිය සහ වෛරය ඇති කරන” බව ද පවසයි.
- විදෙස්ගත ගනුදෙනුකරුවන් සමඟ ව්‍යාපාර හරහා ඇමරිකානු ඩොලර්වලින් ගෙවීම් ලබන ශ්‍රී ලංකාවේ සිටින පුද්ගලයන්ට විදුලි වාහන ආනයනය කිරීමට බලපත්‍ර ඉල්ලා කම්කරු හා විදේශ රැකියා අමාත්‍ය මනූෂ නානායක්කාර කැබිනට් පත්‍රිකාවක් ඉදිරිපත් කරයි.
- ශ්‍රී ලංකා ටෙස්ට් ක්‍රිකට් නායක දිමුත් කරුණාරත්න ICC ලෝක කුසලාන සුදුසුකම් ලැබීමේ තරඟ (ICC World Cup Qualifiers) සඳහා නම් කරන ලද මූලික කණ්ඩායමට ඇතුල් කෙරේ: ආබාධවලින් පසුවන ආරම්භක පිතිකරුවන් වන කුසල් ජනිත් පෙරේරා සහ පැතුම් නිශ්ශංක සඳහා ආවරණයක් ලෙස කරුණාරත්න එක්කර තිබේ: කරුණාරත්නට “ඉහළ පෙළ පිතිකරුවෙකු ලෙස විශාල අත්දැකීම් තිබෙන බැවින්, මෙම අදියරේදී ඔහුගේ පැමිණීම ශ්‍රී ලංකා කණ්ඩායමට ඉතා වැදගත් වන” බව ක්‍රීඩා විචාරකයහු පෙන්වා දෙති.
