රෂිකා හෙන්නායක මැයි 29, කොළඹ LNW :
මඩකලපුව ප්‍රදේශයේ හෝටල් කාමරයක ඇති වූ ගින්නකින් දරුවන් දෙදෙනෙකු මියයෑමේ ශෝකජනක පුවතක් පිටුපස ඇති බරපතල වංචාවක් පොලිසිය විසින් හෙළිදරව් කරගෙන ඇත.
පරීක්ෂණවලට අනුව, අත්අඩංගුවට ගත් පියා සිය බිරිඳට පිළිකාවක් ඇති බව පවසා ව්‍යාජ තොරතුරු පතුරුවමින් සහ දරුවන් යොදාගනිමින් මුදල් එකතු කිරීමේ ජාවාරමක නිරත වී තිබේ.
මොහු සතුව තිබී ඇත්තේ වෙනත් පුද්ගලයෙකුට අයත් සොරකම් කරන ලද හැඳුනුම්පතක් බවත්, ඔහු පදිංචිය සහ අනන්‍යතාවය පිළිබඳව දිගින් දිගටම බොරුවෙන් මහජනයා රවටා ඇති බවත් අනාවරණය විය.
දරුවන්ගේ මවට පිළිකාවක් නොමැති බව තහවුරු වී ඇති අතර, ඇය මේ වන විට වැඩිදුර ප්‍රශ්න කිරීම් සඳහා පොලිස් භාරයට ගෙන ඇත.
සැකකරු මීට පෙරද විවිධ ප්‍රදේශවල මුල්‍ය වංචාවන් සම්බන්ධයෙන් චෝදනා ලැබූ අයෙකු බව හෙළි වී තිබේ.
මේ වන විට මඩකලපුව පොලිසිය මෙම ද්විත්ව මරණ සහ වංචාකාරී ක්‍රියාවන් පිළිබඳව පළල් පරීක්ෂණයක් ක්‍රියාත්මක කරයි.
