බස්නාහිර පළාත් භාර ජ්‍යේෂ්ඨ නියෝජ්‍ය පොලිස්පති ධුරයෙහි වැඩබැලීම සඳහා නියෝජ්‍ය පොලිස්පති ඩී. ජේ. පලිහක්කාර මහතාව පත්කර තිබේ.
පොලිස්පති සී. ඩී. වික්‍රමරත්න මහතා විසින් පත්කිරීම සිදුකර ඇත්තේ දින 14ක කාලයක් සඳහා පමණක් බලපැවැත්වෙන පරිදි බව සඳහන්.
ඒ අනුව අද සිට සති දෙකක් නිවාඩු ලබාගෙන සිටින බස්නාහිර පළාත් භාර ජ්‍යේෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා නිවාඩු අවසන් කර යළි රාජකාරියට වාර්තා කරන තෙක් තාවකාලිකව මෙසේ වැඩබලන නියෝජ්‍ය පොලිස්පතිවරයෙකුව පත්කර ඇති බවයි පොලිස් මූලස්ථානය පවසන්නේ.
මැයි 09 වනදා ගෝල්ෆේස් අරගල භූමියට එල්ල වූ ප්‍රහාරය සම්බන්ධයෙන් දැඩි චෝදනා එල්ල වී සිටින දේශබන්දු තෙන්නකෝන් මහතාව බස්නාහිර පළාතෙන් මාරුකර යවන ලෙස නීතිපති දෙපාර්තමේන්තුව පොලිසියට දැනුම් දී තිබුණ ද පොලිසිය මෙතෙක් එය ඉටු කරන ආකාරයක් පෙනෙන්නටවත් නැත.
RN
