රෂිකා හෙන්නායක ජුනි 12,ලෝකය (අවුට්බවුන්ඩ් ටුඩේ):
ගාසා තීරයේ වෙසෙන පිළිකා රෝගී දරුවන්ට කඩිනමින් අවශ්‍ය ප්‍රතිකාර ලබාගැනීම සඳහා එතෙර වීමට අවසර දෙන ලෙස අමෙරිකානු කොන්ග්‍රස් මණ්ඩලයේ සාමාජිකයින් පිරිසක් ඊශ්‍රායල රජයෙන් ඉල්ලා තිබේ.
ඊශ්‍රායල හමුදා ක්‍රියාමාර්ග හේතුවෙන් ගාසාහි සෞඛ්‍ය පද්ධතිය බරපතල ලෙස විනාශ වී ඇති අතර, මේ හේතුවෙන් දහස් සංඛ්‍යාත රෝගීන්ගේ ජීවිත දැඩි අවදානමකට ලක්ව ඇති බව වාර්තා වේ.
රෝගීන්ට සහ ඔවුන්ගේ සහායකයින්ට බටහිර ඉවුරේ පිහිටි රෝහල් වෙත යාමට ආරක්ෂිත වෛද්‍ය කොරිඩෝවක් නිර්මාණය කරන ලෙස ලිපියක් මගින් අමෙරිකානු රාජ්‍ය ලේකම්වරයාගෙන් ඉල්ලා ඇත. ප්‍රතිකාර ප්‍රමාද වීම නිසා සිදුවන මරණ සංඛ්‍යාව ඉහළ ගොස් ඇති බැවින්, මෙම මානුෂීය අර්බුදය විසඳීමට මැදිහත් වන ලෙස අමෙරිකානු දේශපාලනඥයෝ අවධාරණය කරති.
මේ හරහා ඔවුන් බලාපොරොත්තු වන්නේ වගකීම් සහගත ලෙස රෝගීන් ඉවත් කිරීම සහ ඔවුන්ට නැවත සිය මව්බිමට පැමිණීමට ඇති අයිතිය සහතික කිරීමයි.
