රෂිකා හෙන්නායක ජූනි 17, කොළඹ LNW :
2019 පාස්කු ඉරිදා ත්‍රස්ත ප්‍රහාර සම්බන්ධයෙන් සිදුකෙරෙන විමර්ශන සම්බන්ධයෙන් තමා අත්අඩංගුවට ගැනීම වැළැක්වීමේ නියෝගයක් ඉල්ලා හිටපු ජනාධිපති ගෝඨාභය රාජපක්ෂ ගොනු කළ රිට් පෙත්සම අද පස්වරු 1.30 ට අභියාචනාධිකරණය හමුවේ විභාගයට ගැනීමට නියමිතය.
හිටපු ජනාධිපතිවරයා වෙනුවෙන් ජනාධිපති නීතිඥ රොමේෂ් ද සිල්වා මහතා පෙනී සිටීමට නියමිතය.
අද(170 උදෑසන මෙම නඩුව කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජෙනරාල් සුහර්ෂි හේරත් මහත්මිය අධිකරණයට දැනුම් දුන්නේ නීතිපති දෙපාර්තමේන්තුවට පෙත්සම් පත්‍රිකා ලැබී ඇත්තේ අද උදෑසන 8.00 ට පමණ බවයි. වගඋත්තරකරුවන්ගෙන් තවමත් උපදෙස් ලැබී නොමැති බව ඇය වැඩිදුරටත් පැවසුවාය.
මේ අතර, අභියාචනාධිකරණ සභාපති විනිසුරු රොහන්ත අබේසූරිය මහතා සමඟ විනිසුරු මඩුල්ලේ අසුන් ගත් ප්‍රියන්ත ප්‍රනාන්දු මහතා පෙත්සම විභාග කිරීම ප්‍රතික්ෂේප කළ බවද වාර්තා වේ.
