සටහන – පුලී
ජූනි 20, LNW (කොළඹ): හිටපු ඇමරිකානු ජනාධිපති බරක් ඔබාමා, චිකාගෝ නගරයේ නව ඔබාමා ජනාධිපති මධ්‍යස්ථානය (Obama Presidential Center) විවෘත කිරීමේ උත්සවයේදී සිය බිරිඳ මිෂෙල් ඔබාමා කළ සංවේදී කතාව අතරතුර හැඟීම්බර වූ අයුරු දැකගත හැකි විය.
හිටපු ජනාධිපති ආර්යාවක වන මිෂෙල් ඔබාමා, සිය සැමියාගේ ජනාධිපති ධුර කාලය තුළ සිදුකළ සේවාවන් අගය කරමින්, සෞඛ්‍ය සේවා පුළුල් කිරීම, ආර්ථික ප්‍රතිසංස්කරණ සහ ඔසාමා බින් ලාඩන් ඝාතනයට මඟ පෑදූ මෙහෙයුම ඇතුළු ජයග්‍රහණ රැසක් පිළිබඳ සඳහන් කළාය.
“බරක්, ඔබ මාව බලන්න ඕන,” යනුවෙන් ඇය සිය කතාව ආරම්භ කළ අතර, එම ප්‍රකාශය උත්සවයට සහභාගී වූ පිරිස අතර සිනහවක් ඇති කරන්නට විය.
“වසර අටක් දේශපාලන ගිනි කුටියක සිටියත් ඔබ කිසි දිනක එම උණුසුමට දිය වී ගියේ නැහැ,” යනුවෙන් ඇය ඔහු ගැන හරි උජාරුවට පැවසීය.
මිෂෙල් ඔබාමා සඳහන් කළේ, ඇමරිකාවේ පළමු කළු ජාතික ජනාධිපතිවරයා ලෙස බරක් ඔබාමා, වෙනත් නායකයන්ට වඩා ඉහළ ප්‍රමිතීන් යටතේ විනිශ්චය කරනු ලැබූ බවයි. ඔහුගේ උපත, ආගම සහ දේශප්‍රේමය පිළිබඳ පැතිර ගිය අසත්‍ය චෝදනාද ඇය සිහිපත් කළාය.
එම කතාව අතරතුර බරක් ඔබාමාගේ දෑස් තෙත් වූ බවත්, ඔහු කඳුළක් පිස දැමූ බවත් රැස්ව සිටි අයවලුන්ට දැකගත හැකි විය.
පසුව සිය කතාව සඳහා වේදිකාවට පැමිණි බරක් ඔබාමා, “ඇය මාව හැඟීම්බර කරයි කියලා දැනගෙනම එහෙම කළා,” යනුවෙන් විහිළුවෙන් සඳහන් කළේය.
නොබෙල් සාම ත්‍යාගය පිළිබඳ සඳහන සහ ට්‍රම්ප් සම්බන්ධ විවරණ!
මිෂෙල් ඔබාමා සිය සැමියාට හිමි වූ නොබෙල් සාම ත්‍යාගය පිළිබඳව ද විශේෂයෙන් සඳහන් කළාය. එම ප්‍රකාශය, දේශපාලන විචාරකයන් විසින් වර්තමාන ජනාධිපති ඩොනල්ඩ් ට්‍රම්ප් වෙත එල්ල වූ වක්‍ර විවේචනයක් ලෙස අර්ථකථනය කර තිබේ.
ට්‍රම්ප් පසුගිය වසරවලදී තමන් නොබෙල් සාම ත්‍යාගය සඳහා සුදුසුකම් ඇති බව ප්‍රසිද්ධියේ පවසා ඇති අතර, ඔහු සහ ඔබාමා දෙපළ අතර දිගුකාලීන දේශපාලන මතභේද පවතී.
හිටපු ජනාධිපතිවරුන්ගේ සහභාගිත්වය!
මෙම උත්සවයට හිටපු ජනාධිපතිවරුන් වන බිල් ක්ලින්ටන්, ජෝර්ජ් ඩබ්ලිව්. බුෂ් සහ ජෝ බයිඩන් සහභාගී වූහ. කෙසේ වෙතත් වර්තමාන ජනාධිපති ඩොනල්ඩ් ට්‍රම්ප්ට ආරාධනා කර නොතිබූ බව ද වාර්තා වේ.
චිකාගෝ දකුණු ප්‍රදේශයේ ජැක්සන් පාක් හි පිහිටි අක්කර 20ක මෙම මධ්‍යස්ථානය, ඔබාමා යුවළ ධවල මන්දිරයට යාමට පෙර ජීවත් වූ ප්‍රදේශයට ආසන්නව ඉදිකර ඇත.
වර්තමාන ඇමරිකාව පිළිබඳ ඔබාමාගේ අදහස්!
තම කතාවේදී බරක් ඔබාමා පැවසුවේ මෙම මධ්‍යස්ථානය “ප්‍රජාවක ජීවමාන සැමරුමක්” ලෙස සැලසුම් කර ඇති බවයි.
ඔහු ඩොනල්ඩ් ට්‍රම්ප්ගේ නම සෘජුවම සඳහන් නොකළද, වර්තමාන ඇමරිකානු දේශපාලන වාතාවරණය පිළිබඳව ද අදහස් පළ කළේය.
“අද අපි කෝපය සහ බෙදීම වැඩි වූ කාලයක ජීවත් වෙනවා. එහෙත් ජනතාව තවමත් සාධාරණත්වය, සාමාන්‍ය බුද්ධිය සහ අන්‍යෝන්‍ය ගෞරවය සොයනවා,” යනුවෙන් ඔහු පැවසීය.
ට්‍රම්ප් පාලනය සහ දේශපාලන පසුබිම!
2025 දී දෙවන වරටත් ධුරයට පත් වූ ජනාධිපති ඩොනල්ඩ් ට්‍රම්ප්ගේ පාලනය, සංක්‍රමණ ප්‍රතිපත්ති, ෆෙඩරල් ආයතන ප්‍රතිසංස්කරණ සහ විදේශ ප්‍රතිපත්ති සම්බන්ධයෙන් දැඩි විවාදයන්ට ලක්ව ඇත.
ඔබාමා සහ ට්‍රම්ප් අතර දේශපාලන මතභේද වසර ගණනාවක් පුරා පැවති අතර, ට්‍රම්ප් 2010 දශකයේ මුල් භාගයේදී ඔබාමාගේ උපත පිළිබඳ අසත්‍ය ප්‍රකාශ ප්‍රචාරය කළ ප්‍රමුඛ චරිතයක් ලෙසද සැලකේ.
විචාරකයන් පෙන්වා දෙන්නේ, ඔබාමා ජනාධිපති මධ්‍යස්ථානය විවෘත කිරීමේ උත්සවය පමණක් නොව, එහිදී ඉදිරිපත් වූ කතාද වර්තමාන ඇමරිකානු දේශපාලන බෙදීම් සහ ප්‍රජාතන්ත්‍රවාදී අගයන් පිළිබඳ විවාදය නැවත මතු කළ අවස්ථාවක් බවයි.
