සටහන: සශිකලා මධුෂාණි, ජුනි 23,
ලෝකය (අවුට්බවුන්ඩ් ටුඩේ) : හිටපු එක්සත් ජනපද ජනාධිපති ඩොනල්ඩ් ට්‍රම්ප් ඊයේ දිනයේදී(22) කොන්සර්වේටිව් උපදේශන කණ්ඩායමක් වන ඇදහිල්ල සහ නිදහස් සන්ධානය විසින් පවත්වන ලද වොෂින්ටන් සමුළුවකදී සිය ගණනක් ආධාරකරුවන් ඉදිරියේ ඉවැන්ජලිස්ත කිතුනුවන්ගෙන් ඉල්ලා තිබුණේ, ඔවුන්ගේ ආගමික නිදහස ආරක්ෂා කිරීම සඳහා මෙවර නොවැම්බර් මාසයේදී පැවැත්වීමට නියමිත ජනාධිපතිවරණයේදී තමා වෙනුවෙන් තව එකම වරක් ජන්දය ප්‍රකාශ කරන ලෙසයි.
Pew පර්යේෂණ මධ්‍යස්ථානයට අනුව, ට්‍රම්ප්ගේ 2016 ජයග්‍රහණය සඳහා ඉවැන්ජලිස්ත ඡන්දදායකයින් තීරණාත්මක සාධකයක්ව ඇති අතර 2020 ව්‍යාපාරයේදී, සුදු ඉවැන්ජලිස්ත රෙපරමාදු භක්තිකයන්ගෙන් සියයට 84 ක් ඔහුට ඡන්දය ලබා දී තිබිණි.
පල්ලියේ කලාතුරකින් පෙනී සිටින ට්‍රම්ප් මෙහිදී තවදුරටත් පොරොන්දු වී තිබුණේ, කිතුනුවන්ට සිදුවන නීති විරෝධී වෙනස්කම් කිරීම්, හිරිහැර කිරීම්, පීඩාවන් විමර්ශනය කිරීම, මෙන්ම ක්‍රිස්තියානි විරෝධී පක්ෂග්‍රාහීත්වයට එරෙහිව සටන් කිරීම සඳහා නව ෆෙඩරල් කාර්ය සාධක බලකායක් නිර්මාණය කිරීමට තමා සුදානම් බවයි.
