සටහන – පුලී
ජූලි 04, LNW (කොළඹ): ලෝකප්‍රකට පොප් ගායිකා ටේලර් ස්විෆ්ට් සහ ඇමෙරිකානු පාපන්දු තරු ට්‍රැවිස් කෙල්සි නිල වශයෙන් විවාහ දිවියට පිවිස ඇති බව වාර්තා වේ. ඔවුන්ගේ අතිශය ආකර්ෂණීය මංගල උත්සවය නිව්යෝර්ක් නගරයේ ප්‍රසිද්ධ මැඩිසන් ස්ක්වෙයාර් ගාර්ඩන් ක්‍රීඩාංගණයේදී පැවැත්වුණු අතර, එය හොලිවුඩ් සහ සංගීත ලෝකයේ ප්‍රසිද්ධ තරු රැසක් එක් කළ අතිවිශිෂ්ට අවස්ථාවක් බවට පත්විය.
මෙම විවාහ උත්සවයේ විවාහ නීතිමය කටයුතු සිදුකරනු ලැබුවේ ජනප්‍රිය නළු ඇඩම් සැන්ඩ්ලර් විසිනි. මනාලිය සහ මනාලයා දෙදෙනාම ලොව සුප්‍රසිද්ධ ක්‍රිස්ටියන් ඩියෝර් ඇඳුම් ආයිත්තම් වලින් සැරසී සිටි අතර, ටේලර් ස්විෆ්ට්ගේ දිගුකාලීන මහජන සම්බන්ධතා නිලධාරිනිය ඒ බව තහවුරු කළාය.
මෙම විවාහයේ විශේෂත්වයක් වූයේ සම්ප්‍රදායික මනාලියගේ සහ මනාලයාගේ සහායක කණ්ඩායම් නොසිටීමයි. ඒ වෙනුවට ටේලර්ගේ සහෝදරයා වන ඔස්ටින් ස්විෆ්ට් ඇයගේ “Man of Honour” ලෙස කටයුතු කළ අතර, ට්‍රැවිස්ගේ සහෝදරයා වන ජේසන් කෙල්සි “Best Man” ලෙස උත්සවයට එක්විය.
මෙම මංගල උත්සවය හේතුවෙන් මැන්හැටන් නගරයේ ඉතා කාර්යබහුල මාර්ගයක ගමනාගමනයද තාවකාලිකව නවතා දැමීමට සිදුවිය. එමෙන්ම, හොලිවුඩ් සහ විනෝදාස්වාද ක්ෂේත්‍රයේ ප්‍රකට තරු රැසක්ද මෙම අවස්ථාවට සහභාගී වූහ. ඔවුන් අතර නළු හියු ග්‍රාන්ට්, ජේසන් සුඩෙයිකිස්, ගායක බෙන්සන් බූන් සහ සුප්‍රසිද්ධ නිරූපිකා ගිගි හැඩිඩ් ඇතුළු පිරිසක් කැපී පෙනුණි.
තම ආදරණීය ගායිකාවගේ විවාහය එක මොහොතකට හෝ දැක ගැනීමේ බලාපොරොත්තුවෙන් දහස් සංඛ්‍යාත රසිකයන් ක්‍රීඩාංගණය අසල රැඳී සිටි අතර, ඇතැම් පිරිස් වඩා හොඳ දසුනක් ලබා ගැනීම සඳහා ගොඩනැගිලිවල පඩිපෙළ සහ තාවකාලික ව්‍යුහ මතටද නැගී සිටි බව වාර්තා විය.
විවාහ සැමරුම් ආරම්භ වූයේ බ්‍රහස්පතින්දා දිනයේ පැවති සමීප හිතවතුන් සහ පවුලේ සාමාජිකයන් පමණක් සහභාගී වූ කුඩා පෙර-සාදයකිනි. එය සම්බන්ධයෙන් නිව්යෝර්ක් නගර බලධාරීන් වෙත අවසර ඉල්ලුම්පත්‍රයක්ද ගොනු කර තිබූ බව සඳහන් වේ.
ඉකුත් සිකුරාදා පැවති ප්‍රධාන විවාහ උත්සවය විශාල පරිමාණයෙන් සංවිධානය කර තිබූ අතර, ආරාධිතයන්ගේ පෞද්ගලිකත්වය ආරක්ෂා කිරීම සඳහා ක්‍රීඩාංගණය ඉදිරිපිට විශේෂ ආවරණයක් ඉදිකර තිබුණි. කළු පැහැති සුඛෝපභෝගී SUV රථ පෙළක් එම ආවරණය හරහා ක්‍රීඩාංගණයට ඇතුළු වන අයුරුද දැකගත හැකි විය.
කෙසේ වෙතත්, ආරාධිතයන් කිහිපදෙනෙකු මාධ්‍යවේදීන්ගේ කැමරා කාචවලට හසු වූහ. ඔවුන් අතර නිරූපිකා ජිජි හැඩිඩ්, ඇයගේ පෙම්වතා වන නළු බ්‍රැඩ්ලි කූපර්, නිළි ඩකෝටා ජොන්සන් මෙන්ම ට්‍රැවිස් කෙල්සි ක්‍රීඩා කරන කැන්සස් සිටි චීෆ්ස් කණ්ඩායමේ සාමාජිකයන් ද සිටියහ.
ලොව පුරා මිලියන ගණනක රසික ආදරය දිනාගත් මෙම යුවළගේ විවාහ උත්සවය වසරේ වඩාත්ම කතාබහට ලක්වන ප්‍රසිද්ධ පුද්ගලයන්ගේ උත්සවයක් ලෙස ඉතිහාසයට එක්වනු ඇති බව විචාරකයෝ පෙන්වා දෙති.
