සටහන – පුලී
ජූලි 15, LNW (කොළඹ): සමහර තරග ජයග්‍රහණවලින් මතකයේ රැඳෙයි. තවත් සමහර තරග පාපන්දු ඉතිහාසයම වෙනස් කරයි. ඩැලස්හිදී පැවැති FIFA ලෝක කුසලාන අවසන් පූර්ව තරගයේදී ස්පාඤ්ඤය කළේ ඉන් දෙවැන්නයි. ලෝක පාපන්දුවේ ප්‍රබලතම කණ්ඩායමක් වන ප්‍රංශය 2-0ක් ලෙස පරාජය කළ ලා රෝහා, 2010න් පසු පළමු වරට ලෝක කුසලාන අවසන් මහා තරගයට පිවිසෙමින් නැවතත් තම රතු අධිරාජ්‍යය ලොවට මතක් කර දුන්නේය.
තරගයේ පළමු මිනිත්තුවේ සිටම පිටියේ අණ දුන්නේ ස්පාඤ්ඤයයි. පන්දුව ඔවුන්ගේ පාදවල නටද්දී, ප්‍රංශ ක්‍රීඩකයන්ට ඒ පසුපස දිවීමට පමණක් සිදුවිය. කෙටි පාස් කිරීම්, ඉක්මන් චලනයන් සහ නිර්මාණශීලී ප්‍රහාර මගින් ස්පාඤ්ඤය තරගය තමන්ගේම වේදිකාවක් බවට පත් කර ගන්නට විය.
ප්‍රංශය සතුව සිටි ලෝක මට්ටමේ දක්ෂතා පවා එදා රාත්‍රියේ බැබළුණේ නැත. ස්පාඤ්ඤයේ ආරක්ෂක පෙළ යකඩ බිත්තියක් සේ නැගී සිටි අතර, මැදපෙළ ක්‍රීඩකයන් ප්‍රංශයේ ප්‍රහාර ආරම්භ වීමටත් පෙර ඒවා විනාශ කළහ. පන්දුව නැති වූ සෑම මොහොතකම එය නැවත දිනා ගැනීමට ස්පාඤ්ඤය දැක්වූ උනන්දුව ප්‍රංශයට හුස්ම ගැනීමටවත් ඉඩ නොදුන් බවක් පෙනිණි.
ගෝල දෙක පමණක් ලකුණු පුවරුවේ සටහන් වුවද, පිටියේ දිස් වූ වෙනස ඊට වඩා බොහෝ විශාල විය. එය හුදෙක් ජයග්‍රහණයක් නොව, ලෝක පාපන්දුයට ස්පාඤ්ඤය තවමත් “කලාත්මක පාපන්දුවේ රජවරුන්” බව යළිත් පසක් කළ පණිවිඩයකි.
මෙම ජයග්‍රහණයත් සමඟ ස්පාඤ්ඤ කණ්ඩායම 2010න් පසු පළමු වරට ලෝක කුසලාන අවසන් මහා තරගයට සුදුසුකම් ලබා ගත් අතර, ඔවුන්ගේ මීළඟ අභියෝගය වන්නේ එංගලන්තය හෝ ආර්ජන්ටිනාව සමඟ ලෝක පාපන්දුයේ උතුම්ම කුසලානය වෙනුවෙන් සටන් කිරීමයි.
දැන් ප්‍රශ්නය එකයි… නැවතත් ලෝකය රතු පාටින් වර්ණවත් වෙයිද? නැත්නම් අවසන් සටනේදී නව ඉතිහාසයක් ලියැවෙයිද? පාපන්දු ලෝලීන්ගේ හදවත් දැන් සිටම අවසන් මහා තරගයේ විසිල් හඬ එනතුරු ගැහෙමින් පවතී.
