රෂිකා හෙන්නායක ජූලි 22, ලෝකය (අවුට්බවුන්ඩ් ටුඩේ):
සිඩ්නි නුවරදී අප්‍රේල් මාසයේදී සිදු කළ අහඹු breath test ක්‍රියාවකින් අනතුරුව චෝදනා ලැබූ ඔස්ට්‍රේලියානු ක්‍රිකට් ක්‍රීඩක ඩේවිඩ් වෝනර්, මත්පැන් පානය කර රිය පැදවීමේ වරද පිළිගෙන තිබේ.
මැයි මාසයේ පැවති අධිකරණ විභාගයකින් පසුව ඔහුගේ නීතිඥ බොබී හිල් ප්‍රකාශ කර තිබුණේ, මෙම ක්‍රිකට් ක්‍රීඩකයා තම වරද පිළිගන්නා බවත්, තම හැසිරීම “මෝඩ” සහ “වගකීම් විරහිත” එකක් බව ඔහු වටහාගෙන සිටින බවත්ය. එබැවින් මෙම වරද පිළිගැනීමක් සිදුවනු ඇතැයි අපේක්ෂා කෙරිණි.
පාස්කු ඉරිදා දින තම මෝටර් රථයට නැගීමට පෙර මිතුරෙකුගේ නිවසේදී වෝනර් වයින් වීදුරු තුනක් පානය කර තිබූ බව හිල් මීට පෙර පැවති විභාගයේදී සඳහන් කළේය.
දඬුවම් නියම කිරීම අගෝස්තු 18 වන දිනට නියම කර ඇති අතර, එහිදී වෝනර්ට අවම වශයෙන් මාස හයක කාලයක් රිය පැදවීම තහනම් වීමටත්, ඕස්ට්‍රේලියානු ඩොලර් 2,200ක් (ඇමරිකානු ඩොලර් 1,500ක් හෝ බ්‍රිතාන්‍ය පවුම් 1,150ක්) දක්වා දඩයකට සහ මාස නවයක් දක්වා සිර දඬුවමකට ලක්වීමටත් ඉඩ ඇත.
2024 දී ජාත්‍යන්තර ක්‍රිකට් ක්‍රීඩාවෙන් සමුගත් වෝනර්, දැනට පාකිස්තාන සුපර් ලීග් තරගාවලියේ ‘කරාචි කිංග්ස්’ කණ්ඩායමේ මෙන්ම ‘සිඩ්නි තන්ඩර්’ කණ්ඩායමේද නායකයා ලෙස කටයුතු කරයි.
අප්‍රේල් මාසයේදී ඔහුට චෝදනා එල්ල වූ අවස්ථාවේදී ‘ක්‍රිකට් NSW’ (Cricket NSW) හි ප්‍රධාන විධායක නිලධාරී ලී ජර්මන් ප්‍රකාශ කළේ, එම චෝදනා “කනස්සල්ලට කරුණක්” බවත් ආයතනය ඒවා “ඉතා බැරෑරුම් ලෙස” සලකන බවත්ය.
“ක්‍රිකට් NSW හි අප, මත්පැන් පානය කර රිය පැදවීමට නොව ආරක්ෂිතව රිය පැදවීමට දැඩි ලෙස පෙනී සිටිනවා,” යැයි ඔහු පැවසීය.
තමන් සිදු කළ දේ වැරදි බව වෝනර් දැන සිටි බව හිල් මැයි මාසයේ පැවති විභාගයේදී පැවසීය. “Uber සේවාවක් ලබාගැනීම වෙනුවට මෝටර් රථයට නැගීම වගකීම් විරහිත සහ මෝඩ තීරණයක් බව ඔහු පිළිගන්නවා.”
“ස්වාමින් වහන්සේගේ උත්ථාන දිනයේදී වයින් වීදුරුවක් පානය කිරීම අපරාධයක් නොවේ. ඇත්ත වශයෙන්ම, සමහරු එය සම්පූර්ණයෙන්ම සුදුසු ක්‍රියාවක් ලෙස සලකනු ඇත,” යැයි ඔහු වැඩිදුරටත් පැවසීය.
